بھارتی فاسٹ بولر محمد سراج نے انگلینڈ کے خلاف پانچویں اور آخری ٹیسٹ کے دوسرے دن شاندار کارکردگی کا مظاہرہ کرتے ہوئے بین الاقوامی کرکٹ میں ایک اہم سنگ میل عبور کر لیا ہے۔
انگلینڈ کے خلاف شاندار اسپیل
بھارت کی ٹیم دوسرے دن 224 رنز پر آؤٹ ہوئی، جس کے بعد سراج نے پرسدھ کرشنا کے ساتھ مل کر انگلینڈ کی بیٹنگ لائن کو دباؤ میں ڈال دیا۔ دونوں بولرز نے 4،4 وکٹیں حاصل کیں اور انگلینڈ کو 247 رنز پر آؤٹ کر دیا۔سراج نے اہم کھلاڑیوں اولی پوپ، جو روٹ، ہیری بروک اور جیمی اسمتھ کو پویلین بھیجا۔
118 ٹیسٹ وکٹیں اور نیا ریکارڈ
اس شاندار اسپیل کے بعد محمد سراج کی ٹیسٹ وکٹوں کی تعداد 118 ہوگئی ہے۔ وہ ون ڈے میں 71 اور ٹی ٹوئنٹی میں 14 وکٹیں لے چکے ہیں، یوں ان کی بین الاقوامی وکٹوں کی مجموعی تعداد 203 ہوگئی، جو کہ سچن ٹنڈولکر کی 201 وکٹوں سے زیادہ ہے۔
بمراہ کا ریکارڈ ٹوٹ گیا
یہ سراج کا انگلینڈ میں چھٹا موقع تھا جب انہوں نے کسی ایک اننگز میں چار وکٹیں حاصل کیں، اس طرح انہوں نے جسپریت بمراہ کے پانچ چار وکٹوں والے اسپیلز کا ریکارڈ توڑ دیا۔
ایشیائی بولرز میں وقار یونس کے برابر
ایشیائی بولرز میں صرف پاکستان کے لیجنڈری فاسٹ بولر وقار یونس ہی ہیں جنہوں نے انگلینڈ میں چھ بار چار یا اس سے زائد وکٹیں حاصل کیں اور مجموعی طور پر 45 وکٹیں اپنے نام کیں۔محمد سراج کی یہ شاندار کارکردگی بھارت کے لیے سیریز میں فیصلہ کن ثابت ہوسکتی ہے اور ان کا شمار اب دنیا کے نمایاں فاسٹ بولرز میں ہونے لگا ہے۔
