ویب ڈیسک: سماجی رابطوں کی سب سے بڑی کمپنی میٹا (Meta) نے اعلان کیا ہے کہ وہ فیس بک اور انسٹاگرام کا ایک نیا ورژن متعارف کرا رہی ہے جو مکمل طور پر اشتہارات سے پاک ہوگا۔ تاہم اس سہولت کے لیے صارفین کو ماہانہ فیس ادا کرنا ہوگی۔
غیر ملکی خبر رساں ادارے کے مطابق برطانیہ میں اس سروس کے تحت:
ویب صارفین کو 2.99 پاؤنڈ ماہانہ
موبائل فون صارفین کو 3.99 پاؤنڈ ماہانہ
ادا کرنا ہوں گے۔
اشتہارات کے ساتھ یا بغیر — صارفین کی پسند
میٹا کے ترجمان کے مطابق یہ سبسکرپشن سروس صرف اُن صارفین کے لیے ہوگی جو پلیٹ فارم پر اشتہارات دیکھنا نہیں چاہتے۔ اگر کوئی صارف فیس ادا نہیں کرنا چاہتا تو وہ بدستور مفت ورژن استعمال کر سکے گا مگر اسے اشتہارات دیکھنا ہوں گے۔نئی سروس مرحلہ وار آئندہ چند ہفتوں میں متعارف کرائی جائے گی۔
پس منظر اور ریگولیٹری دباؤ
یہ ماڈل بنیادی طور پر یورپی ریگولیٹرز کی بڑھتی ہوئی جانچ پڑتال کے جواب میں پیش کیا جا رہا ہے۔ اس سے قبل یورپی یونین میں بھی میٹا نے اسی طرز کی سروس پیش کی تھی، جسے "ڈیجیٹل مارکیٹس ایکٹ" کی خلاف ورزی قرار دیا گیا تھا۔یورپی کمیشن نے اس سال میٹا پر 200 ملین یورو جرمانہ عائد کیا تھا اور کہا تھا کہ کمپنی کو کم سے کم ذاتی ڈیٹا جیسے عمر، صنف اور مقام کی بنیاد پر مفت اشتہارات والا ورژن بھی لازمی دینا چاہیے تھا۔
فیس ادا کرنے والوں کے لیے سہولتیں
کمپنی کا کہنا ہے کہ جو صارفین ماہانہ فیس ادا کریں گے:انہیں ویڈیوز کے دوران کوئی اشتہار نہیں دکھایا جائے گا۔ان کے ذاتی ڈیٹا کو اشتہارات کے مقاصد کے لیے استعمال نہیں کیا جائے گا۔
