کیف: روس نے یوکرین پر میزائلوں اور ڈرونز سے حملے کیے، جن کے نتیجے میں مختلف علاقوں میں کم از کم 8 افراد ہلاک جبکہ متعدد زخمی ہو گئے۔
میڈیا رپورٹس کے مطابق حملوں میں رہائشی عمارتوں، بنیادی ڈھانچے اور دیگر شہری تنصیبات کو بھی نقصان پہنچا۔یوکرینی حکام کے مطابق حملوں کا نشانہ کئی شہر بنے، جہاں فضائی دفاعی نظام نے متعدد ڈرونز اور میزائل تباہ کر دیے، تاہم بعض اپنے اہداف تک پہنچ گئے۔ امدادی کارکنوں نے ملبے تلے دبے افراد کو نکالنے کے لیے ریسکیو کارروائیاں کیں۔دوسری جانب روسی وزارتِ دفاع کا کہنا ہے کہ حملوں میں فوجی اور دفاعی صنعت سے متعلق اہداف کو نشانہ بنایا گیا، جبکہ یوکرین کا مؤقف ہے کہ زیادہ تر حملے شہری علاقوں پر کیے گئے، جن کے نتیجے میں عام شہری ہلاک اور زخمی ہوئے۔واضح رہے کہ حالیہ ہفتوں میں روس اور یوکرین کے درمیان فضائی حملوں میں نمایاں اضافہ دیکھنے میں آیا ہے۔ اقوام متحدہ اور دیگر بین الاقوامی اداروں نے شہری ہلاکتوں پر تشویش کا اظہار کرتے ہوئے تمام فریقوں پر زور دیا ہے کہ بین الاقوامی انسانی قانون کے مطابق شہریوں اور شہری تنصیبات کا تحفظ یقینی بنایا جائے۔
