مکہ مکرمہ: دنیا بھر کے کروڑوں مسلمانوں کی نگاہیں آج ایک بار پھر بیت اللہ شریف کی جانب مرکوز ہیں، جہاں 15 محرم الحرام کے موقع پر غسلِ کعبہ کی روح پرور اور ایمان افروز تقریب منعقد کی جائے گی۔
یہ بابرکت روایت عہدِ نبوی ﷺ سے جاری ہے اور ہر سال انتہائی عقیدت و احترام کے ساتھ ادا کی جاتی ہے۔نمازِ فجر کے بعد خانہ کعبہ کے اندرونی حصے کی دیواروں اور فرش کو آبِ زم زم، عرقِ گلاب اور خالص عود سے معطر پانی سے غسل دیا جائے گا۔اس موقع پر بیت اللہ کا اندرونی ماحول خوشبوؤں سے مہک اٹھتا ہے، جو ہر مسلمان کے دل میں خانہ کعبہ سے محبت، عقیدت اور روحانی وابستگی کے جذبات کو مزید تازہ کر دیتا ہے۔تقریب میں مکہ مکرمہ کے گورنر، سعودی شاہی خاندان کے اہم افراد، حرمین شریفین کے آئمہ کرام، اعلیٰ حکام اور حرمین شریفین انتظامیہ کے منتخب اراکین شرکت کریں گے۔
غسلِ کعبہ کی یہ مقدس تقریب اسلامی تاریخ، عقیدت اور روحانیت کا ایک منفرد مظہر سمجھی جاتی ہے۔ یہ صرف ایک مذہبی رسم نہیں بلکہ امتِ مسلمہ کے لیے بیت اللہ سے محبت، احترام اور والہانہ وابستگی کی علامت بھی ہے۔دنیا بھر کے مسلمان اس بابرکت موقع کو نہایت عقیدت سے مناتے ہیں اور دعا کرتے ہیں کہ اللہ تعالیٰ انہیں بھی اپنے مقدس گھر کی حاضری اور زیارت نصیب فرمائے۔
