برمنگھم: پاکستان کے اسٹار جیولن تھرو ایتھلیٹ ارشد ندیم نے کامن ویلتھ گیمز میں عمدہ کارکردگی کا مظاہرہ کرتے ہوئے جیولن تھرو ایونٹ کے فائنل راؤنڈ کے لیے کوالیفائی کر لیا، جبکہ پاکستان کے دوسرے ایتھلیٹ یاسر سلطان فائنل میں جگہ بنانے میں ناکام رہے۔
جیولن تھرو کے کوالیفائنگ راؤنڈ میں ارشد ندیم نے اپنی بہترین تھرو 78.63 میٹر پھینکی، جس کی بدولت وہ مجموعی طور پر ساتویں نمبر پر رہے۔ بہترین کارکردگی کی بنیاد پر ٹاپ 12 ایتھلیٹس نے فائنل راؤنڈ کے لیے کوالیفائی کیا، جن میں ارشد ندیم بھی شامل ہیں۔کوالیفائنگ مرحلے میں ہر کھلاڑی کو تین تھروز کا موقع دیا گیا، تاہم کوئی بھی ایتھلیٹ 84 میٹر کا مقررہ کوالیفائنگ اسٹینڈرڈ حاصل نہ کر سکا، جس کے باعث بہترین تھروز کی بنیاد پر فائنلسٹس کا انتخاب کیا گیا۔دوسری جانب پاکستان کے یاسر سلطان 74.36 میٹر کی بہترین تھرو کے ساتھ مجموعی طور پر 14ویں پوزیشن پر رہے اور ٹاپ 12 میں جگہ نہ بنا سکے، جس کے باعث ان کا سفر کوالیفائنگ مرحلے پر ہی ختم ہو گیا۔
اب تمام نظریں فائنل مقابلے پر مرکوز ہیں، جہاں اولمپک اور عالمی سطح پر پاکستان کا نام روشن کرنے والے ارشد ندیم سے ایک بار پھر شاندار کارکردگی اور میڈل جیتنے کی امید کی جا رہی ہے۔ کھیلوں کے شائقین کو توقع ہے کہ وہ فائنل میں اپنی بہترین صلاحیتوں کا مظاہرہ کرتے ہوئے پاکستان کے لیے ایک اور اعزاز حاصل کریں گے۔
