فلکیاتی شائقین کے لیے سال 2026 کا آغاز ایک نہایت دلکش اور یادگار فلکیاتی مظہر کے ساتھ ہونے جا رہا ہے۔
ماہرینِ فلکیات کے مطابق 3 جنوری 2026 کو سال کا پہلا مکمل چاند پوری آب و تاب کے ساتھ آسمان پر جلوہ گر ہوگا، جسے روایتی طور پر وولف مون (Wolf Moon) کہا جاتا ہے۔ماہرین کا کہنا ہے کہ یہ مکمل چاند سورج غروب ہونے کے فوراً بعد واضح طور پر دکھائی دے گا۔ اس خاص موقع پر چاند زمین کے قریب ترین مقام پر ہوگا، جس کے باعث وہ عام مکمل چاند کے مقابلے میں زیادہ بڑا، زیادہ روشن اور زیادہ واضح نظر آئے گا۔ اسی وجہ سے اسے سپر مون کا درجہ دیا جاتا ہے۔فلکیاتی ماہرین کے مطابق سپر مون کے دوران چاند کی غیر معمولی چمک آسمان کو ایک سحر انگیز منظر میں بدل دیتی ہے۔ خوش آئند بات یہ ہے کہ اس خوبصورت نظارے سے لطف اندوز ہونے کے لیے کسی دوربین یا خاص فلکیاتی آلات کی ضرورت نہیں ہوگی، بلکہ صاف آسمان کی صورت میں یہ منظر ننگی آنکھ سے بھی بخوبی دیکھا جا سکے گا۔
ماہرین نے مزید بتایا کہ سال 2026 فلکیاتی اعتبار سے خاص اہمیت رکھتا ہے، کیونکہ جنوری کے اس سپر مون کے بعد نومبر اور دسمبر 2026 میں مزید دو سپر مون بھی دیکھنے کو ملیں گے۔ یہ تمام مظاہر نہ صرف فلکیات کے شوقین افراد بلکہ عام لوگوں کے لیے بھی قدرت کے حسین کرشموں کو قریب سے دیکھنے کا ایک یادگار موقع ثابت ہوں گے۔
