پشاور میں حالیہ موسمی صورتحال کے مطابق خیبر پختونخوا کے ضلع دیر بالا اور دیر لوئر میں شہری علاقوں میں بارش اور پہاڑوں پر برفباری کا سلسلہ شروع ہو گیا ہے۔
وادی کمراٹ، جہاز بانڈہ، باڈگوائی، لواری ٹنل، کلپانی، شاہی اور بن شاہی میں برف باری جاری ہے۔بارش اور برف باری کے آغاز سے سردی کی شدت میں اضافہ ہوا ہے، جس کے بعد شہریوں میں خوشی کی لہر دوڑ گئی اور کئی لوگوں نے موسم کا لطف اٹھانے کے لیے سیاحتی مقامات کا رخ کیا۔ ساتھ ہی، ٹھنڈی ہواؤں نے سردی میں اضافہ کیا ہے۔دوسری جانب، پی ڈی ایم اے پنجاب نے بھی صوبے کے بالائی علاقوں میں بارش اور برفباری کی پیشگوئی جاری کی ہے۔ 2 جنوری تک راولپنڈی، مری، گلیات، اور پوٹھوہار ریجن میں بارش اور برفباری کے امکانات ہیں۔
پنجاب کے دیگر شہروں جیسے لاہور، شیخوپورہ، سرگودھا، خوشاب، فیصل آباد، حافظ آباد، گجرانوالہ، منڈی بہاوالدین، گجرات، سیالکوٹ، جھنگ اور ٹوبہ ٹیک سنگھ میں 31 دسمبر سے 1 جنوری کے دوران ہلکی بارش کا امکان ہے۔بارش کے اثرات کے نتیجے میں دھند اور سموگ کی صورتحال میں کمی آئے گی، جبکہ پی ڈی ایم اے کا کنٹرول روم 24 گھنٹے صورتحال کی نگرانی کر رہا ہے۔ شہریوں کو ہدایت کی گئی ہے کہ خراب موسم کے دوران غیر ضروری سفر سے گریز کریں تاکہ حادثات سے بچا جا سکے۔
