بھارتی ریاست اتر پردیش کے ضلع سنت کبیر نگر کے گاؤں کٹار جوٹ میں ایک انوکھا واقعہ پیش آیا، جہاں شوہر ببلو نے اپنی بیوی اور اس کے آشنا کی شادی کرادی۔
اس واقعے نے سب کو حیران کن طور پر سوچنے پر مجبور کردیا۔2017 میں ببلو نے گورکھ پور سے تعلق رکھنے والی رادھیکا سے شادی کی تھی اور ان کے دو بچے بھی ہیں۔ تاہم، محنت مزدوری کے لیے دوسری ریاست میں رہائش پذیر ببلو کو پتا چلا کہ اس کی بیوی کا ڈیڑھ سال سے وکاس نامی لڑکے کے ساتھ معاشقہ چل رہا ہے۔جب ببلو کو اس حقیقت کا علم ہوا تو اس نے اپنی بیوی سے بات کی اور حقیقت کی تصدیق ہونے کے بعد ایک انتہائی غیر معمولی فیصلہ کیا۔ ببلو نے اپنی بیوی رادھیکا اور اس کے آشنا وکاس کی شادی کرادی اور خود بچوں کی پرورش کرنے کا فیصلہ کیا۔اس سوال پر کہ اس نے ایسا کیوں کیا، ببلو نے جواب دیا کہ وہ ایسے واقعات دیکھ چکا ہے جن میں شوہروں کو ان کی بیویوں اور آشنا کے ہاتھوں قتل کر دیا گیا۔ ببلو نے مزید کہا کہ حالیہ دنوں میں میرٹھ میں پیش آنے والے ایسے واقعات نے اسے اس فیصلہ تک پہنچایا تاکہ وہ دونوں سکون سے رہ سکیں۔
اس واقعے کے بعد، ببلو کا کہنا تھا کہ اس نے یہ قدم اس لیے اٹھایا تاکہ وہ اپنے بچوں کی پرورش کر سکے اور بیوی کو اپنے آشنا کے ساتھ آزادی دے سکے۔ بھارتی میڈیا کے مطابق اس فیصلے نے علاقے میں ہلچل مچا دی ہے اور لوگوں کے درمیان اس کے بارے میں مختلف رائے پائی جارہی ہے۔یہ واقعہ بھارت میں ہونے والے دیگر واقعات کی ایک کڑی بن گیا ہے، جن میں شادی شدہ خواتین نے اپنے آشنا کے ساتھ مل کر اپنے شوہروں کو قتل کر دیا تھا، اور اس معاملے میں ببلو نے اس قسم کے ناخوشگوار حالات سے بچنے کی کوشش کی۔
