سانحہ گل پلازہ :کمشنر کی حتمی تحقیقاتی رپورٹ تیار ،وزیراعلی کو پیش کی جائیگی

  گرائونڈ فلور پر موجود بچے کے ہاتھوں فلاور شاپ میں آگ لگی،  79 اموات ہوئیں
، زیادہ تر اموات گل پلازا کے میزنائن فلور پر ہوئیں،پلازہ کے اکثر دروازے بند تھے:رپورٹ
 کراچی (آئی این پی )کمشنر کراچی نے سانحہ گل پلازہ کی حتمی تحقیقاتی رپورٹ تیار کرلی۔ذرائع کے مطابق سانحہ گل پلازہ کی حتمی تحقیقاتی رپورٹ کمشنر کراچی اور ایڈیشنل آئی جی پر مشتمل کمیٹی نے تیار کی ہے، کمشنر کراچی گل پلازہ میں آتشزدگی کے واقعے کی رپورٹ وزیراعلی سندھ مراد علی شاہ کو پیش کریں گے۔ذرائع  کے مطابق  رپورٹ میں آگ لگنے کی وجوہات اور آگ بجھانے سمیت ریسکیو سے متعلق تفصیلات شامل ہیں۔ اس کے علاوہ رپورٹ میں متاثرین، عینی شاہدین اور ریسکیو حکام سے حاصل معلومات درج ہیں۔ ذرائع کے مطابق رپورٹ میں لکھا ہے کہ گرائونڈ فلور پر موجود بچے کے ہاتھوں فلاور شاپ میں آگ لگی، آگ تیزی سے پھیلی اور ایئرکنڈیشن کے ڈکٹس کی طرف سے پھیلی۔ذرائع کا کہنا ہے تحقیقاتی رپورٹ میں بتایا گیا ہے کہ آگ لگنے سے 79 اموات ہوئیں، زیادہ تر اموات گل پلازا کے میزنائن فلور پر ہوئیں۔