سندھ کابینہ نے کراچی کیلئے ڈبل ڈیکر بسوں کی منظوری دیدی اینٹی نارکوٹکس کو آٹو میٹڈ کرنے کا فیصلہ

 وزیراعظم نے وعدہ کیا تھا   180 الیکٹرک بسیں وفاقی حکومت دے گی ،وفاق سے  بسوں کی خریداری کیلئے فنڈ نہیں دئیے گئے
محکمہ ٹرانسپورٹ خواتین کیلئے فری پنک سکوٹر دینے جا رہا ہے، جن خواتین کے پاس 2 وہیلر لائسنس ہو گا انہیں سکوٹر دیا جائیگی:شرجیل میمن
 کراچی (آئی این پی )سندھ کابینہ نے کراچی کے لیے ڈبل ڈیکر بسوں اور مزید الیکٹریکل بسوں کی پروکیورمنٹ کی منظوری دیدی۔سندھ کے سینئر وزیر شرجیل میمن کا کابینہ  اجلاس کے بعد پریس کانفرنس کرتے ہوئے کہنا تھا  سندھ کابینہ نے اینٹی نارکوٹکس کو آٹو میٹڈ کرنے کا فیصلہ کیا ہے، کابینہ سے ڈبل ڈیکر بسز کی منظوری بھی لی ہے جبکہ مزید الیکٹریکل بسوں کی پروکیورمنٹ کی منظوری بھی دی گئی ہے۔ان کا کہنا تھا وزیراعظم نے وعدہ کیا تھا کہ 180 الیکٹرک بسیں وفاقی حکومت دے گی، وعدے کے مطابق 180 بسیں فراہم کریں، وفاقی حکومت کی جانب سے بسوں کی خریداری کیلئے فنڈ نہیں دئیے گئے۔صوبائی وزیر کا کہنا تھا محکمہ ٹرانسپورٹ خواتین کیلئے فری پنک اسکوٹر دینے جا رہا ہے، جن خواتین کے پاس 2 وہیلر لائسنس ہو گا انہیں اسکوٹر دی جائے گی، ہر ماہ قرعہ اندازی کے ذریعے خواتین کو الیکٹرک بائیکس دیں گے، اسٹوڈنٹ، ملازمت پیشہ خواتین الیکٹرک بائیک کی اہل ہوں گی۔شرجیل میمن کا کہنا تھا جن خواتین کو بائیک چلانی نہیں آتی انہیں لیڈی انسٹرکٹر کے ذریعے تربیت دلوائی جائے گی، جن خواتین کو الیکٹرک بائیک ملے گی اسے7 سال تک فروخت نہیں کیا جا سکے گا۔