وزیر دفاع خواجہ محمد آصف نے اپنے حالیہ بیان میں 9 مئی کے واقعات کے ماسٹر مائنڈ اور اس میں ملوث افراد کے خلاف فوری کارروائی کی اہمیت پر زور دیا ہے۔
انہوں نے اپنے پیغام میں کہا کہ پاکستان میں حقیقی انصاف تب تک ممکن نہیں جب تک ان افراد کو سزا نہیں دی جاتی جنہوں نے 9 مئی کو ملک کے اہم اداروں کے خلاف منصوبہ بندی کی تھی۔ خواجہ آصف نے اس بات کا بھی ذکر کیا کہ پاکستان کی جانب سے اس معاملے پر پُرعزم موقف کو اجاگر کرنے کے لیے ڈی جی آئی ایس پی آر کی بریفنگ نے اہم کردار ادا کیا ہے۔وزیر دفاع نے مزید کہا کہ پاکستان میں استحکام اور انصاف کے لیے فوری اور فیصلہ کن اقدامات کی ضرورت ہے۔
انہوں نے اس بات پر زور دیا کہ دنیا کے دیگر ترقی یافتہ ممالک جیسے برطانیہ، فرانس اور امریکا میں مجرموں کو انصاف کے کٹہرے میں لانے کے لیے فوری کارروائیاں کی جاتی ہیں اور اسی طرح پاکستان میں بھی 9 مئی کے واقعات میں ملوث افراد کو سزا دینے کے لیے فوری اقدامات کیے جائیں۔خواجہ آصف نے کہا کہ یہ پاکستان کے مفاد میں ہے کہ اس نوعیت کے جرائم کی روک تھام کے لیے موثر قانونی کارروائیاں کی جائیں تاکہ مستقبل میں اس طرح کے واقعات کی روک تھام کی جا سکے اور ملک میں حقیقی انصاف قائم ہو سکے۔
