برطانیہ میں شدید دھند کے باعث فلائٹ آپریشن میں مشکلات پیش آ رہی ہیں، جس کی وجہ سے گیٹوک، ہیتھرو اور مانچسٹر ایئرپورٹس پر پروازوں میں تاخیر اور منسوخیاں ہو رہی ہیں۔
برطانوی میڈیا کے مطابق، دھند کی شدت کے باعث ایئرپورٹس پر ویژبلیٹی میں کمی آئی ہے، جس کی وجہ سے کئی پروازوں کی روانگی میں ایک سے تین گھنٹے کی تاخیر ہو رہی ہے۔گیٹوک ایئرپورٹ سے روانہ ہونے والی پروازوں میں زیادہ تر تاخیر کا سامنا ہے، اور یہ خدشہ ظاہر کیا جا رہا ہے کہ مزید پروازوں کی روانگی میں بھی تاخیر ہو سکتی ہے۔ ہیتھرو اور مانچسٹر ایئرپورٹس پر بھی فلائٹ آپریشن متاثر ہو رہے ہیں، اور ایئرپورٹس نے مسافروں کو مزید پروازوں کی منسوخی اور تاخیر کے بارے میں خبردار کیا ہے۔
ایئرپورٹس کی طرف سے مسافروں کو مشورہ دیا گیا ہے کہ وہ اپنی ایئر لائنز سے رابطہ کریں اور سفر سے پہلے اپنی پرواز کی حیثیت کی تصدیق کر لیں تاکہ انہیں غیر متوقع تاخیر یا منسوخی کا سامنا نہ ہو۔ حکام نے دھند کی شدت کے پیش نظر، ایئر لائنز اور ایئرپورٹس سے تعاون کی اپیل کی ہے تاکہ مسافروں کی حفاظت کو یقینی بنایا جا سکے اور پروازوں کی روانگی میں مشکلات کم کی جا سکیں۔
