ی ڈی ایم اے پنجاب نے حالیہ دھند اور سموگ کے حوالے سے الرٹ جاری کیا ہے، جس میں تمام کمشنرز اور ڈپٹی کمشنرز کو ہدایت کی گئی ہے کہ وہ بروقت اقدامات کریں تاکہ عوام کی صحت اور سڑکوں کی حفاظت یقینی بنائی جا سکے۔
ڈی جی عرفان علی کاٹھیا نے بتایا کہ لاہور، شیخوپورہ، قصور سمیت دیگر اضلاع میں شدید دھند اور سموگ کا سامنا ہو سکتا ہے۔ دیگر اضلاع میں فیصل آباد، ننکانہ، گوجرانوالہ، جھنگ، ٹوبہ، ساہیوال، لیہ، کوٹ ادو، ملتان، بہاولپور، رحیم یار خان اور خانپور شامل ہیں۔صوبہ بھر کی انتظامیہ کو ہدایت کی گئی ہے کہ وہ دھند اور سموگ کی روک تھام کے لیے حکومتی اقدامات پر عمل درآمد یقینی بنائیں۔ سموگ سے سانس کے امراض اور دیگر بیماریاں پھیلنے کا امکان ہے، خاص طور پر بچے اور بوڑھے زیادہ متاثر ہو سکتے ہیں۔
ڈی جی پی ڈی ایم اے کا کہنا ہے کہ دھند کے سبب سڑکوں پر حادثات میں اضافے کا بھی خطرہ ہے۔ اس کے علاوہ، فصلوں کی باقیات اور کوڑا کرکٹ جلانے پر مقدمہ درج کرنے کا بھی فیصلہ کیا گیا ہے۔انتظامیہ کو ہدایت کی گئی ہے کہ وہ بھرپور انسداد سموگ اور آگاہی مہم چلائیں تاکہ ماحولیاتی آلودگی کو کم کیا جا سکے اور صحت کو محفوظ رکھا جا سکے۔یہ اقدامات عوام کی صحت اور سڑکوں کی سلامتی کے لیے نہایت اہم ہیں، اور فوری عمل درآمد سے بہتری ممکن ہے۔
