راوی میں پانی کی سطح کم ہو رہی ہے، کسی بھی ہنگامی صورتحال کے لیے تیار ہیں: ڈپٹی کمشنر لاہور

لاہور میں ممکنہ سیلابی صورتحال سے نمٹنے کے لیے ضلعی انتظامیہ نے تمام تیاریاں مکمل کر لی ہیں۔

 شہر کی انتظامیہ اور متعلقہ اداروں کی جانب سے جاری کیے گئے بیان کے مطابق، لاہور میں سیلاب کا کوئی فوری خطرہ نہیں ہے، کیونکہ دریائے راوی میں پانی کی سطح معمول کے مطابق ہے اور مسلسل کم ہو رہی ہے۔ڈپٹی کمشنر لاہور کیپٹن (ر) علی اعجاز نے میڈیا سے گفتگو میں بتایا کہ شہر میں پانی کی سطح کی نگرانی جاری ہے اور کسی بھی ہنگامی صورتحال سے نمٹنے کے لیے مکمل تیاریاں کی گئی ہیں۔ انہوں نے کہا کہ ان کی نگرانی میں دریائے راوی میں پانی کی سطح میں کمی آ رہی ہے اور حالات قابو میں ہیں۔انہوں نے مزید بتایا کہ ضلعی انتظامیہ نے ممکنہ سیلاب کے پیش نظر انخلا اور فلڈ ریلیف کیمپس کا منصوبہ تیار کیا ہے، تاکہ کسی بھی ہنگامی حالت میں شہریوں کو فوری مدد فراہم کی جا سکے۔ شہر بھر میں 24 فلڈ ریلیف کیمپس فعال کر دیے گئے ہیں، جن میں متعلقہ عملہ 24 گھنٹے موجود رہتا ہے تاکہ امدادی کارروائیاں بروقت انجام دی جا سکیں۔
ڈپٹی کمشنر نے شہریوں سے اپیل کی ہے کہ وہ ہنگامی حالات میں محتاط رہیں اور انتظامیہ کی ہدایات پر عمل کریں۔ انہوں نے بتایا کہ ضلعی انتظامیہ شہریوں کے جان و مال کے تحفظ کے لیے تمام وسائل بروئے کار لا رہی ہے، اور کسی بھی مشکل کی صورت میں فوری اقدامات کیے جا رہے ہیں۔انہوں نے کہا کہ شہریوں کی حفاظت ہماری ترجیح ہے اور انتظامیہ کسی بھی صورتحال سے نمٹنے کے لیے مکمل تیار ہے۔ شہر کے رہائشیوں کو یقین دہانی کراتے ہوئے انہوں نے کہا کہ فی الحال سیلاب کا کوئی خطرہ نہیں ہے اور حالات قابو میں ہیں۔یہ اقدامات اس لیے کیے گئے ہیں تاکہ لاہور شہر کو ممکنہ سیلابی صورتحال سے محفوظ رکھا جا سکے اور شہریوں کو بروقت مدد فراہم کی جا سکے۔