اقوام متحدہ نے پاکستان میں حالیہ سیلاب سے متاثرہ افراد کی فوری مدد کے لیے 6 لاکھ ڈالر کی ہنگامی امداد جاری کرنے کا اعلان کیا ہے۔
اقوام متحدہ کے ترجمان کے مطابق یہ امداد متاثرین کی بنیادی ضروریات پوری کرنے کے لیے فراہم کی جا رہی ہے، تاکہ متاثرہ علاقوں میں خوراک، رہائش، طبی امداد اور دیگر سہولیات کی بروقت فراہمی ممکن بنائی جا سکے۔ ترجمان نے کہا کہ اس امداد کا مقصد سیلاب زدہ خاندانوں کی مشکلات کو کم کرنا اور انہیں ابتدائی ریلیف فراہم کرنا ہے۔مزید بتایا گیا کہ امدادی کارروائیوں کی قیادت حکومتِ پاکستان کر رہی ہے، جبکہ اقوام متحدہ اور اس کے مقامی شراکت دار ادارے مکمل تعاون فراہم کر رہے ہیں۔ امداد کی تقسیم اور فراہمی کے عمل میں مقامی انتظامیہ اور انسانی ہمدردی کے ادارے بھی شامل ہوں گے تاکہ متاثرین تک شفاف اور بروقت رسائی کو یقینی بنایا جا سکے۔
اقوام متحدہ کے ایک اعلیٰ سطحی وفد کی جانب سے آج سیلاب سے متاثرہ علاقوں کا دورہ بھی کیا جائے گا۔ وفد زمینی صورتحال کا جائزہ لے گا اور مقامی کمیونٹیز سے ملاقات کر کے مستقبل کی امدادی حکمت عملی کو مزید مؤثر بنانے کیلئے تجاویز تیار کرے گا۔ترجمان نے اس عزم کا اظہار کیا کہ اقوام متحدہ پاکستان کو مشکل وقت میں تنہا نہیں چھوڑے گا اور زمینی حقائق کے مطابق مزید امداد فراہم کی جائے گی۔ انہوں نے کہا کہ عالمی برادری کو بھی چاہیے کہ وہ پاکستان کے ساتھ یکجہتی کا مظاہرہ کرے تاکہ سیلاب متاثرین کی بحالی کے عمل میں تیزی لائی جا سکے۔
