لاہور: پاکستان تحریک انصاف (پی ٹی آئی) کے احتجاج کے پیش نظر لاہور کے داخلی اور خارجی راستوں کو دوبارہ سیل کر دیا گیا ہے۔
رنگ روڈ کو ٹریفک کی آمدورفت کے لیے تاحکم ثانی بند کر دیا گیا ہے، جبکہ شہر کے مختلف علاقوں جیسے داتا دربار، شالامار اور راوی روڈ پر کنٹینرز رکھ دیے گئے ہیں۔ اس کے علاوہ، موٹروے گزشتہ تین روز سے بند ہے، جس سے لاہور میں ٹریفک کی صورتحال بدتر ہو گئی ہے۔رنگ روڈ کی بندش کے باعث شہر میں ٹریفک کی روانی متاثر ہوئی ہے، اور دیگر اہم سڑکوں پر جیسے کینال نہر، فیصل ٹاؤن روڈ، گارڈن ٹاؤن، فیروز پور روڈ، گلبرگ اور مزنگ روڈ پر بھی ٹریفک کی لمبی قطاریں لگ گئی ہیں۔
پاکستان کے جڑواں شہروں اسلام آباد اور راولپنڈی کے داخلی اور خارجی راستے بھی پی ٹی آئی کے احتجاج کی وجہ سے بند ہیں، جس سے شہریوں کو شدید مشکلات کا سامنا ہے۔ اس صورتحال کے باعث کاروباری سرگرمیاں اور تعلیمی ادارے بھی بند ہیں۔کشیدہ حالات پر قابو پانے کے لیے حکومت نے اسلام آباد میں فوج کی تعیناتی کر رکھی ہے، تاکہ امن و امان برقرار رکھا جا سکے اور مزید ناخوشگوار واقعات سے بچا جا سکے۔
