شام کے مرکزی بینک نے اعلان کیا ہے کہ یکم جنوری 2026 سے ملک بھر میں نئے کرنسی نوٹ جاری کیے جائیں گے۔
یہ اقدام کرنسی سواپ منصوبے کے تحت کیا جا رہا ہے، جس کا مقصد پرانے اور خستہ حال نوٹوں کو مرحلہ وار نئے نوٹوں سے تبدیل کرنا ہے۔مرکزی بینک کے مطابق عوام کو اپنی موجودہ کرنسی بغیر کسی اضافی فیس کے نئے نوٹوں میں تبدیل کروانے کی سہولت فراہم کی جائے گی۔ کرنسی کی تبدیلی کا عمل یکم جنوری سے باضابطہ طور پر شروع ہوگا اور اسے مرحلہ وار مکمل کیا جائے گا تاکہ مالیاتی نظام میں کسی قسم کا دباؤ یا خلل پیدا نہ ہو۔بینک حکام نے تمام کمرشل بینکوں اور مجاز مالیاتی اداروں کو ہدایات جاری کر دی ہیں تاکہ عوام کو بروقت اور آسان سہولت میسر ہو۔
شامی مرکزی بینک کا کہنا ہے کہ نئے کرنسی نوٹ جدید سیکیورٹی فیچرز سے آراستہ ہوں گے، جن میں جعلی نوٹوں کی روک تھام کے لیے خصوصی علامات اور جدید پرنٹنگ ٹیکنالوجی شامل ہے۔ اس اقدام سے نہ صرف کرنسی کی حفاظت بہتر ہوگی بلکہ مالی لین دین میں شفافیت بھی بڑھے گی۔بینک نے عوام سے اپیل کی ہے کہ وہ افواہوں پر کان نہ دھریں اور صرف مستند ذرائع سے حاصل ہونے والی معلومات پر بھروسہ کریں۔ کرنسی کی تبدیلی کے عمل کی نگرانی سختی سے کی جائے گی اور کسی بھی قسم کی بدعنوانی یا بے ضابطگی برداشت نہیں کی جائے گی۔
