تھائی لینڈ کے دارالحکومت بینکاک میں سام سین روڈ پر ایک شدید حادثہ پیش آیا جب اچانک زمین 160 فٹ گہری اور 98 فٹ چوڑی دھنس گئی، جس سے تین گاڑیاں گڑھے میں جا گریں اور قریبی علاقوں کو خالی کرانا پڑا۔
واقعہ بدھ کی صبح تقریباً 7 بجے سامنے آیا، جو ایک اسکول، اسپتال اور پولیس اسٹیشن کے انتہائی قریب تھا۔رائل تھائی پولیس کے مطابق واجیرا اسپتال کے سامنے زمین تقریباً 30 بائے 30 میٹر کے رقبے پر بیٹھ گئی، جس کی گہرائی 50 میٹر تک پہنچی۔ اس کے نتیجے میں دو بجلی کے کھمبے اور ایک پولیس اسٹیشن کی گاڑی بھی گڑھے میں جا گری۔ مقامی میڈیا کی رپورٹس کے مطابق سام سین میٹروپولیٹن پولیس اسٹیشن کو بھی نقصان پہنچا۔سوشل میڈیا پر وائرل ویڈیوز میں دیکھا جا سکتا ہے کہ زمین دھنسنے کے بعد مصروف شاہراہ پر گاڑیاں غیر متوقع طور پر حرکت کر رہی تھیں۔ واقعے کے بعد واجیرا اسپتال اور قریبی گھروں کو خالی کرایا گیا۔
بینکاک کے گورنر چڈچارٹ ستیپنٹ نے بتایا کہ گڑھا زیرِ زمین میٹرو اسٹیشن کی تعمیراتی سرگرمیوں کے باعث بنا۔ بارش اور خراب موسم کے باوجود کسی جانی نقصان کی اطلاع نہیں ملی۔پولیس اور نیشنل پولیس کمشنر نے میٹروپولیٹن پولیس بیورو کو ہدایت کی کہ بینکاک میٹروپولیٹن ایڈمنسٹریشن سمیت متعلقہ اداروں کے ساتھ مل کر فوری اقدامات کیے جائیں، پانی کی پائپ لائنوں کی مرمت کی جائے اور عوام کو ہر ممکن امداد فراہم کی جائے۔یہ حادثہ بینکاک میں شہری انفراسٹرکچر کی حساسیت اور زیرِ زمین تعمیراتی کاموں کے ممکنہ خطرات کی ایک یاد دہانی بھی ہے۔
