اسلام آباد: وفاقی دارالحکومت میں یونس ایمرے انسٹیٹیوٹ اور ترکش کلچر سینٹر کا افتتاح کیا گیا۔
اس تقریب میں وفاقی وزیر اطلاعات عطاء اللہ تارڑ نے خصوصی خطاب کیا، جس میں پاکستان اور ترکیہ کے درمیان گہرے برادرانہ تعلقات کا تذکرہ کرتے ہوئے ان کے مزید مضبوط ہونے کی اہمیت پر زور دیا۔عطاء اللہ تارڑ نے دونوں ممالک کے عوام کے درمیان گہرا لگاؤ اور محبت کی اہمیت کو اجاگر کرتے ہوئے کہا کہ پاکستان اور ترکیہ کی دوستی کسی سرحد یا حالات کی محتاج نہیں۔ انہوں نے کہا کہ دونوں ممالک نہ صرف جغرافیائی لحاظ سے ایک دوسرے کے قریب ہیں، بلکہ مذہب اور ثقافت کے ذریعے بھی ایک دوسرے سے جڑے ہوئے ہیں۔وفاقی وزیر نے ترکیہ کی جانب سے پاکستان کی ہر مشکل وقت میں مدد کا شکریہ ادا کیا اور اس بات پر زور دیا کہ دونوں ممالک کے تعلقات میں سیاحتی اور ثقافتی شعبوں میں تعاون کے وسیع امکانات موجود ہیں۔
انہوں نے کہا کہ ثقافتی تبادلوں اور عوامی رابطوں کو بڑھا کر پاکستان اور ترکیہ کے تعلقات کو مزید مستحکم بنایا جا سکتا ہے۔عطاء اللہ تارڑ نے دونوں ممالک کے درمیان سیاحت کے شعبے میں مشترکہ منصوبوں کی ضرورت پر بھی روشنی ڈالی، تاکہ دونوں ممالک کے عوام کے درمیان روابط کو فروغ ملے۔افتتاحی تقریب میں دونوں ممالک کے سفارتکاروں، ثقافتی شخصیات اور دیگر اہم شخصیات نے شرکت کی اور اس موقع پر ثقافتی تبادلے اور تعاون کے مستقبل میں امکانات پر بات چیت کی۔
