پہلگام حملے سے واضح ہوگیا مسئلہ کشمیر حل ہوئے بغیر خطے میں امن ممکن نہیں او آئی سی رابطہ گروپ

 او آئی سی کشمیری عوام کی سیاسی اور سفارتی حمایت جاری   اور عالمی برادری کو اس تنازع کے منصفانہ حل کی جانب متوجہ کرتی رہے گی  
او آئی سی بھارت پر دبائو ڈالے تاکہ سیاسی قیدیوں کی رہائی ممکن ہو اور انسانی حقوق کی خلاف ورزیاں بند کی جائیں:طارق فاطمی کا خطاب 
نیویارک(آئی این پی ) اسلامی تعاون تنظیم(او آئی سی ) کے رابطہ گروپ برائے جموں و کشمیر نے  کشمیری عوام کے حقِ خودارادیت کی غیرمتزلزل حمایت کا اعادہ کرتے ہوئیکہا ہے کہ پہلگام حملے کے بعد  واضح ہوگیا ہے  جنوبی ایشیا میں امن و استحکام مسئلہ کشمیر کے منصفانہ حل کے بغیر ممکن نہیں،جبکہ بھارتی رہنمائوں کے اشتعال انگیز بیانات علاقائی امن کے لئے  خطرہ ہیں۔  اقوام متحدہ کی جنرل اسمبلی اجلاس کے موقع  پر او آئی سی رابطہ  گروپ   برائے جموں و کشمیر کا ایک اہم اجلاس منعقد ہوا جس میں مقبوضہ کشمیر کی سنگین سیاسی اور سکیورٹی صورتحال کا تفصیلی جائزہ لیا گیا۔اجلاس کی صدارت او آئی سی کے اسسٹنٹ سیکرٹری جنرل برائے سیاسی امور یوسف ایم نے کی، جبکہ پاکستان، سعودی عرب، ترکیہ، نائیجر اور آذربائیجان کے نمائندوں نے شرکت کی۔ترجمان دفترخارجہ شفقت علی خان کے مطابق اجلاس میں وزیراعظم کے معاون خصوصی برائے خارجہ امور طارق فاطمی نے  بھارت کی غیرقانونی قبضہ مضبوط کرنے ، ظالمانہ قوانین، جبر  اور  آبادیاتی تبدیلیوں کی کوششوں کی مذمت کی اور  کہا کہ جنوبی ایشیا میں پائیدار استحکام جموں و کشمیر کے تنازعے کے حل سے مشروط ہے، انہوں نے کہا کہ بھارت غیر قانونی قبضے کو مضبوط کرنے  کیلئے  ظالمانہ قوانین، جبر اور آبادیاتی تبدیلیوں کی پالیسی پر عمل پیرا ہے۔  طارق فاطمی نے او آئی سی پر زور دیا کہ وہ بھارت پر دبائو ڈالے تاکہ سیاسی قیدیوں کی رہائی ممکن ہو اور انسانی حقوق کی خلاف ورزیاں بند کی جائیں