پاکستان چین اور امریکہ کے درمیان تعمیری کردار ادا کر نے کو تیار ہے رضوان سعید شیخ

 دنیا دو جوہری ریاستوں کے درمیان تصادم کی متحمل نہیں ہو سکتی،  مسئلہ کشمیر کا حلپورے خطے میں پائیدار امن کی ضمانت ہے افغانستان سے دہشت گردی ، پاکستان سب سے زیادہ متاثر ، عوام کی سلامتی پر سمجھوتا نہیں کرے گا: پاکستانی سفیرکا  خطاب 
نیویارک(آئی  این پی )امریکہ میں پاکستان کے سفیر رضوان سعید شیخ نے کہا ہے کہ پاکستان چین اور امریکا کے درمیان تعمیری کردار ادا کرنے کو تیار ہے، دنیا دو جوہری ریاستوں کے درمیان تصادم کی متحمل نہیں ہو سکتی،  مسئلہ کشمیر کا حل خطے میں پائیدار امن کی ضمانت ہے،امریکی صدر ٹرمپ کے پاک بھارت جنگ بندی میں کردار کے معترف ہیں۔ان خیالات کااظہار انہوںنے  فیوچر سکیورٹی سمٹ سے خطاب میں کیا ۔پاکستانی سفیرنے کہا  کہ پاکستان ماحولیاتی تبدیلی سے سب سے زیادہ متاثرہ ملک ہے، ماحولیاتی تبدیلی پاکستان کیلئے وجودی خطرہ بن چکی ہے، جس کے نتیجے میں قدرتی آفات نے ترقی کے عمل کو متاثر کیا ہے ۔پاکستان آئی ایم ایف اور عالمی بینک کے ساتھ ماحولیاتی چیلنجز پر کام کر رہا ہے اور  حالیہ سیلابوں سے متاثرہ عوام کو ریلیف فراہم کرنے کے لیے پاکستان اپنے وسائل بروئے کار لا رہا ہے۔رضوان سعید شیخ کا مزید کہنا تھا کہ پاکستان اور امریکا آبادی کے لحاظ سے دنیا کے بڑے ممالک میں شامل ہیں، اس لئے  دونوں کے درمیان بہتر تعلقات ناگزیر ہیں۔انہوں نے کہا کہ پاکستان اور امریکا کے تعلقات تاریخی تناظر میں خوش آئند سطح پر ہیں اور دونوں ممالک نے مل کر کئی چیلنجز کا مقابلہ کیا ہے۔  ۔انہوں نے کہا کہ ا فغانستان سے جنم لینے والی دہشت گردی سے پاکستان سب سے زیادہ متاثر ہے، پاکستان امن کا خواہاں ہے مگر عوام کی سلامتی پر سمجھوتا نہیں کرے گا۔ اپنی عوام کی سلامتی کو دہشت گردوں کے رحم و کرم پر نہیں چھوڑ اجاسکتا