وزیر اطلاعات پنجاب عظمیٰ بخاری نے ضمنی الیکشن میں کامیاب ہونے والے مسلم لیگ (ن) کے امیدواروں کو مبارکباد دیتے ہوئے کہا ہے کہ جن لوگوں نے چور چور کی نعرہ بازی کی، ان کا مقدر اب دھاندلی دھاندلی کا ورد رہ گیا ہے۔
اپنے بیان میں، پنجاب کی وزیر اطلاعات کا کہنا تھا کہ الحمدللہ، ایک بار پھر عوام نے نوازشریف کی قیادت پر بھرپور اعتماد کا مظاہرہ کیا ہے۔انہوں نے بتایا کہ پنجاب کے تمام حلقوں سے مسلم لیگ (ن) کے امیدواروں کی بڑی لیڈ نے ثابت کیا ہے کہ لوگ مریم نواز کی کارکردگی سے مطمئن ہیں۔عظمیٰ بخاری کا کہنا تھا کہ یہ ووٹ اس وقت ملا ہے جب عوام کو مفت ادویات، گھروں میں انسولین کی فراہمی، صحت کے نئے کلینک، فیلڈ ہسپتال، اور بی ایچ یوز کی حالت بہتر بنانے کے اقدامات نظر آ رہے ہیں۔ان ووٹوں کا تعلق فری ٹریکٹر، فری سپر سیڈر، ٹیوب ویل سولیورائزیشن، اور کسان کارڈ کے پروگرام سے بھی ہے۔انہوں نے بتایا کہ یہ ووٹ ان لوگوں کو بھی ملا ہے جنہوں نے اپنی چھت اور اپنا گھر پروگرام کے تحت ایک لاکھ بیس ہزار گھروں کو فائدہ پہنچایا ہے۔عظمیٰ بخاری کا یہ بھی کہنا تھا کہ عوام نے نواز شریف کے کینسر ہسپتال اور کارڈیالوجی ہسپتال کی ترقی کے لیے بھی ووٹ دیا ہے۔
انہوں نے یہ بھی کہا کہ یہ ووٹ ستھرا پنجاب کی وجہ سے ملا ہے، اور یہ مریم نواز کے ویژن اور کارکردگی کا نتیجہ ہے۔عظمیٰ بخاری نے مزید بتایا کہ یہ نتائج مریم نواز کی ڈیڑھ سالہ کارکردگی کے مثبت اثرات کی عکاسی کرتے ہیں۔انہوں نے کہا کہ مسلم لیگ (ن) کے امیدواروں نے 20 ہزار سے لے کر 1 لاکھ 20 ہزار کی لیڈ سے کامیابی حاصل کی ہے۔ہری پور میں بابر نواز کی فتح نے جعلی تبدیلی کے خواب کو چکنا چور کر دیا ہے، اور چور چور کی نعرہ بازی کرنے والوں کا اب دھاندلی کا شور بھی دم توڑ گیا ہے۔
