بلوچستان حکومت کا 500 نوجوانوں کو بیرون ملک روزگار کی فراہمی کا فیصلہ

 بلوچستان حکومت کے اقدام سے بیرون ملک ملازمتوں کے ذریعے معاشی مشکلات میں کمی آئے گی۔چمن کے نوجوان  ملکی معیشت میں کردار ادا کریں گے
چمن  (آئی این پی )چمن بارڈر پر بے روزگار خاندانوں  کیلئے  روزگار کے نئے مواقع سے معاشی بحالی کی راہ ہموار ہونے لگی  ۔حکومت بلوچستان نے ون ڈاکومنٹ پالیسی کے نفاذ کے بعد 500 بے روزگار نوجوانوں کو بیرون ملک روزگار فراہم کرنے کا فیصلہ  کیا ہے ۔میڈیا رپورٹ کے مطابق وفاقی اور صوبائی حکومت نے چمن کے متاثرہ نوجوانوں کو بیرون ملک روزگار فراہم کرنے کے لئے  تیاریاں مکمل کرلیں۔ بارڈر بندش سے متاثرہ شہریوں کیلئے   ریلیف کے طور پر حکومت بلوچستان پہلے ہی 5 ہزار مفت پاسپورٹس جاری کر چکی ہے۔ چمن بارڈر کی بندش سے بے روزگار ہونے والے نوجوان اب بیرون ملک روزگار حاصل کرسکیں گے۔مزدور پیشہ افراد نے حکومتی اقدام کا خیر مقدم کرتے ہوئے کہا کہ بلوچستان حکومت کے اقدام سے بیرون ملک ملازمتوں کے ذریعے معاشی مشکلات میں کمی آئے گی۔چمن کے نوجوان ترسیلات زر کے ذریعے ملکی معیشت میں کردار ادا کریں گے، متاثرین نے حکومتی فیصلے پر اطمینان کا اظہار کیا۔