پنجاب: ڈومیسائل فیس میں 175 فیصد اضافے کی منظوری

صوبائی کابینہ نے منظوری دی‘ ڈومیسائل فیس 200 روپے سے بڑھا کر 550 روپے مقرر کر دی گئی 
 500 روپے سرکاری خزانے میں جمع ہوں گے‘50 روپے پنجاب انفارمیشن ٹیکنالوجی بورڈ کو  ملیں گے
لاہور(سپیشل رپورٹر‘ایجنسیاں )پنجاب کابینہ نے ڈومیسائل فیس میں 175 فیصد اضافے کی منظوری دیتے ہوئے صوبے میں ڈومیسائل کے اجرا کے نظام کو مکمل طور پر ڈیجیٹل بنانے کا فیصلہ کر لیا ہے، جس کا باقاعدہ نوٹیفیکیشن بھی جاری کر دیا گیا۔نئے فیصلے کے تحت ڈومیسائل فیس 200 روپے سے بڑھا کر 550 روپے مقرر کر دی گئی ہے، اس فیس میں 200 روپے بنیادی فیس، 300 روپے ای افیڈیویٹ اور 50 روپے سروس چارج شامل ہوں گے، حکومتی پالیسی کے مطابق 500 روپے سرکاری خزانے میں جمع ہوں گے جبکہ 50 روپے پنجاب انفارمیشن ٹیکنالوجی بورڈ کو سروس چارج کے طور پر ملیں گے۔حکومت نے ڈومیسائل کے حصول کے عمل کو جدید خطوط پر استوار کرتے ہوئے اسے مکمل ڈیجیٹل اور پیپر لیس بنانے کا فیصلہ کیا ہے، شہری اب ڈومیسائل کیلئے آن لائن درخواست دے سکیں گے، فیس  ای ۔پے پنجاب کے ذریعے ادا کریں گے، اور تیار شدہ ڈومیسائل کورئیر کے ذریعے گھر بیٹھے وصول کر سکیں گے، اس مقصد کیلئے ایک خودکار ڈومیسائل مینجمنٹ سسٹم بھی متعارف کرایا گیا ہے۔نئے نظام کے تحت موبائل ایپ کے ذریعے ڈومیسائل اپلائی اور فیس ادائیگی ممکن ہوگی، جبکہ نادرا طرز کا ڈیجیٹل ویریفکیشن اور ڈیٹا مینجمنٹ سسٹم نافذ کیا جائے گا، حکام کے مطابق اس اقدام سے ڈومیسائل کے اجرا کا دورانیہ کم ہو کر صرف 2 سے 3 دن رہ جائے گا۔کورئیر سروس کیلئے 60 روپے، سکیورٹی پیپر کیلئے 40 روپے، جبکہ ڈیٹا ہوسٹنگ، ایس ایم ایس اور سسٹم مینٹیننس کیلئے 50 روپے شامل کئے گئے ہیں۔