پاکستان کے اقوام متحدہ میں مستقل مندوب عاصم افتخار احمد نے کہا کہ تجارتی مسائل دباؤ سے نہیں، مذاکرات اور سفارت کاری سے حل کرنے کی ضرورت ہے۔
انہوں نے اقوامِ متحدہ کی سلامتی کونسل میں کثیر الجہتی نظام میں اصلاحات کے حوالے سے گفتگو کرتے ہوئے کہا کہ دنیا میں موجود تنازعات اور اختلافات کا حل صرف بات چیت اور سفارت کاری کے ذریعے ممکن ہے، نہ کہ دباؤ کے ذریعے۔عاصم افتخار احمد نے اقوامِ متحدہ میں پاکستانی موقف کو پیش کرتے ہوئے کہا کہ دباؤ کے ذریعے کسی ملک پر شرائط مسلط کرنا مناسب نہیں ہوگا۔ انہوں نے عالمی سطح پر کثیر الجہتی اقدامات کے لیے اعتماد کی بحالی پر زور دیا، تاکہ دنیا بھر میں امن و استحکام کی فضا پیدا کی جا سکے۔
پاکستانی مندوب نے مزید کہا کہ آج دنیا کئی اہم مسائل کا سامنا کر رہی ہے جن میں جنگوں، عدم برابری، معاشی عدم استحکام اور ماحولیاتی تبدیلیوں کی تباہی شامل ہیں۔ یہ تمام مسائل عالمی امن و سلامتی کے لیے ایک سنگین خطرہ ہیں، اور ان کا حل فوری اور مشترکہ عالمی کوششوں کے ذریعے ممکن ہے۔انہوں نے اس بات پر بھی زور دیا کہ اقوام متحدہ جیسے عالمی ادارے کو مزید فعال اور موثر بنانے کے لیے کثیر الجہتی نظام میں اصلاحات ضروری ہیں تاکہ عالمی سطح پر پائیدار امن اور ترقی کے لیے مؤثر اقدامات کیے جا سکیں۔
