فیلڈ مارشل سید عاصم منیر کا کور ہیڈکوارٹرز پشاور کا دورہ، خیبر پختونخوا کی سکیورٹی صورتحال پر بریفنگ‘ فارمیشنز کو ہر وقت چوکس رہنے اور اعلیٰ ترین آپریشنل تیاری برقرار رکھنے کی ہدایت

قوم کی حمایت سے دہشت گردی کو شکست دینگے فیلڈ مارشل
 ملک بھر میں دیرپا امن اور استحکام کے قیام کیلئے پرعزم ہیں‘شہداء  کی عظیم قربانیوں کو کبھی فراموش نہیں کیا جائے گا،فیلڈ مارشل سید عاصم منیر‘ یادگارِ شہدا پر  حاضری، پھولوں کی چادر چڑھائی ‘ فاتحہ خوانی 
فیلڈ مارشل سید عاصم منیر سے فرانس کے سیکرٹری جنرل برائے دفاع و قومی سلامتی نکولس روش کی ملاقات‘ باہمی دلچسپی کے امور، علاقائی سکیورٹی اور دفاع و سلامتی کے شعبوں میں دوطرفہ تعاون پر تبادلہ خیال
راولپنڈی  (آئی این پی‘آن لائن)چیف آف ڈیفنس فورسز فیلڈ مارشل سید عاصم منیر نے کہا ہے  مسلح افواج قوم کی غیرمتزلزل حمایت سے دہشت گردی کو شکست دینے کے عزم پر قائم اور ملک بھر میں دیرپا امن اور استحکام کے قیام کے لیے پرعزم ہیں۔پاک فوج کے شعبہ تعلقات عامہ (آئی ایس پی آر) کے مطابق فیلڈ مارشل سید عاصم منیر نے پشاور کور ہیڈکوارٹرز پشاور کا دورہ کیا جہاں انہیں صوبے کی سیکیورٹی صورتحال اور آپریشنز پر بریفنگ دی گئی۔ آمد پر کور کمانڈر پشاور نے آرمی چیف فیلڈ مارشل عاصم منیر کا استقبال کیا۔آرمی چیف کو پاک افغان بارڈر منیجمنٹ اور فارمیشنز کی آپریشنل تیاریوں پر بھی بریفنگ دی گئی، انسداد دہشت گردی کی کارروائیوں اور سرحدی انتظام پر بھی بریفنگ دی گئی، فیلڈ مارشل نے افسران و جوانوں کے بلند حوصلے اور پیشہ ورانہ مہارت کی تعریف کی۔فیلڈ مارشل سید عاصم منیر کو صوبے میں فارمیشنز کی آپریشنل تیاریوں سے بھی آگاہ کیا گیا، فیلڈ مارشل نے فارمیشنز کو ہروقت چوکس اور آپریشنل تیاری برقرار رکھنے کی ہدایت کردی۔ کہا ملک اور عوام کے تحفظ کیلئے افسرون اور جوانوں کا عزم و حوصلہ لائق تحسین ہے۔آرمی چیف نے یادگارِ شہدا پر پھولوں کی چادر چڑھائی اور فاتحہ خوانی کی۔ فیلڈ مارشل نے مادرِ وطن کے دفاع اور دہشت گردی کے خلاف جنگ میں جانوں کا نذرانہ پیش کرنے والے شہدا کو خراجِ عقیدت پیش کیا۔ فیلڈ مارشل سید عاصم منیر نے کہا کہ شہدا کی عظیم قربانیوں کو کبھی فراموش نہیں کیا جائے گا۔ دریں اثناء فیلڈ مارشل سید عاصم منیر سے فرانس کے سیکریٹری جنرل برائے دفاع و قومی سلامتی نکولس روش کی ملاقات، باہمی دلچسپی کے امور، علاقائی سیکیورٹی اور دفاع و سلامتی کے شعبوں میں دوطرفہ تعاون پر تبادلہ خیال۔آئی ایس پی آر کے مطابق فرانس کے سیکرٹری جنرل برائے دفاع و قومی سلامتی 
نکولس روشے نے پاکستان میں فرانس کے سفیر جین نوئل پوئریر کے ہمراہ جنرل ہیڈ کوارٹرز (جی ایچ کیو) راولپنڈی میں آرمی چیف و چیف آف ڈیفنس فورسز فیلڈ مارشل سید عاصم منیر سے ملاقات کی، ملاقات کے دوران باہمی دلچسپی کے امور، بشمول علاقائی سلامتی اور دفاع و سکیورٹی کے شعبوں میں دوطرفہ تعاون پر تبادلہ خیال کیا گیا، فیلڈ مارشل نے دوطرفہ تعلقات کو مضبوط بنانے اور دفاع و سکیورٹی کے شعبے میں تعاون کو مزید فروغ دینے کے لئے پاکستان کے عزم کا اعادہ کیا، جبکہ نکولس روشے نے علاقائی امن و استحکام کے فروغ کے لئے پاکستان کی کوششوں کا اعتراف کیا