بھارت کے شہر حیدرآباد میں ایک سفاک سابق فوجی نے اپنی بیوی کو قتل کرنے کے بعد اس کے جسم کے ٹکڑے کر کے پریشر ککر میں ابال کر اپنے جرم پر پردہ ڈالنے کی کوشش کی۔
یہ ہولناک واقعہ 16 جنوری کو سامنے آیا، جب مقتولہ کی گمشدگی کی شکایت پولیس میں درج کرائی گئی تھی۔ پولیس تفتیش کے دوران شوہر پر شک کیا گیا اور بعد ازاں اس نے اپنے جرم کا اعتراف کیا۔ملزم گرو مرتی، جو ڈیفنس ریسرچ اینڈ ڈیولپمنٹ آرگنائزیشن میں سیکیورٹی گارڈ کے طور پر کام کرتا تھا، نے پولیس کے سامنے بتایا کہ اس نے اپنی بیوی وینکاٹا مادھوی کو قتل کیا اور پھر اس کے جسم کو باتھ روم میں ٹکڑے کر کے پریشر ککر میں ابال لیا۔ اس کے بعد اس نے ہڈیاں الگ کر کے انہیں مزید کوٹ کر ابالنے کا عمل جاری رکھا، اور تین دن تک گوشت اور ہڈیوں کو پکاتا رہا۔ اس کے بعد اس نے باقی ماندہ ٹکڑوں کو پیک کر کے جھیل میں پھینک دیا۔
پولیس کے مطابق، ملزم نے جرم کا اعتراف کیا اور تحقیقات جاری ہیں تاکہ اس کے دعووں کی تصدیق کی جا سکے۔ مقتولہ کے والدین نے گمشدگی کی شکایت درج کرائی تھی اور ملزم ابتدائی طور پر ان کے ساتھ تفتیش میں شامل تھا۔ جوڑے کے دو بچے بھی ہیں، ایک لڑکا اور ایک لڑکی، جو اس المناک واقعے کے اثرات سے متاثر ہو گئے ہیں۔یہ جوڑا اکثر جھگڑتا تھا، لیکن اب تک یہ واضح نہیں ہو سکا کہ قتل کا اصل محرک کیا تھا۔ پولیس نے مزید تفصیلات کے لیے تحقیقات جاری رکھی ہوئی ہیں۔
