نِشِن (جاپان): ایشین گیمز 2026 کے ویمنز کرکٹ ایونٹ کے فائنل میں بھارت نے سری لنکا کو 147 رنز سے شکست دے کر گولڈ میڈل اپنے نام کر لیا۔
بھارت نے پہلے بیٹنگ کرتے ہوئے 20 اوورز میں 3 وکٹوں کے نقصان پر 216 رنز بنائے، جواب میں سری لنکن ٹیم 15.4 اوورز میں صرف 69 رنز پر ڈھیر ہوگئی۔بھارت نے ٹاس جیت کر پہلے بیٹنگ کا فیصلہ کیا تو اوپنرز سمرتی مندھانا اور شفالی ورما نے ٹیم کو شاندار آغاز فراہم کیا۔ دونوں نے پہلی وکٹ کے لیے 99 رنز کی شراکت قائم کی، جس نے بھارت کے بڑے مجموعے کی بنیاد رکھی۔سمرتی مندھانا نے جارحانہ بیٹنگ کا مظاہرہ کرتے ہوئے 45 گیندوں پر 79 رنز کی شاندار اننگز کھیلی، جس میں پانچ چوکے اور سات چھکے شامل تھے۔ شفالی ورما نے 29 گیندوں پر 48 رنز بنائے۔ دونوں بلے بازوں کی عمدہ کارکردگی کے باعث بھارت نے ابتدائی اوورز ہی میں میچ پر اپنی گرفت مضبوط کرلی۔کپتان ہرمن پریت کور نے 17 گیندوں پر 19 رنز بنائے، جبکہ اختتامی اوورز میں ریچا گھوش نے جارحانہ انداز اپناتے ہوئے صرف 22 گیندوں پر ناقابلِ شکست 49 رنز کی اننگز کھیلی۔ ان کی دھواں دار بیٹنگ کی بدولت بھارت نے مقررہ 20 اوورز میں 216 رنز کا بڑا مجموعہ ترتیب دیا، جو ایشین گیمز ویمنز کرکٹ میں بھارت کا بلند ترین اسکور بھی قرار دیا گیا۔سری لنکا کو میچ جیتنے کے لیے 217 رنز کا ہدف ملا، تاہم بھارتی باؤلرز کے سامنے اس کی بیٹنگ لائن اپ زیادہ دیر مزاحمت نہ کرسکی۔ کپتان چماری اتاپتو نے 29 رنز بنا کر کچھ مزاحمت کی، جبکہ دیگر نمایاں اسکوررز میں کویشا دلہاری اور کوشانی نوتھیانگانا شامل رہیں۔
بھارت کی جانب سے دیپتی شرما نے شاندار باؤلنگ کرتے ہوئے 4 اوورز میں صرف 6 رنز دے کر 3 وکٹیں حاصل کیں۔ شفالی ورما، شری چرانی اور شریانکا پاٹیل نے بھی 2،2 وکٹیں حاصل کرکے سری لنکن بیٹنگ کو مکمل طور پر تباہ کردیا۔سری لنکا کی پوری ٹیم 15.4 اوورز میں 69 رنز پر آل آؤٹ ہوگئی اور یوں بھارت نے 147 رنز کے بڑے مارجن سے کامیابی حاصل کرکے گولڈ میڈل جیت لیا۔ سری لنکا کو سلور میڈل پر اکتفا کرنا پڑا۔اس کامیابی کے ساتھ بھارت نے ایشین گیمز ویمنز کرکٹ کا ٹائٹل بھی برقرار رکھا۔ بھارت نے گزشتہ ایڈیشن میں بھی ویمنز کرکٹ میں گولڈ میڈل حاصل کیا تھا، جبکہ 2026 کے ایشین گیمز میں یہ بھارتی دستے کا پہلا گولڈ میڈل بھی ہے۔واضح رہے کہ اس سے قبل پاکستان ویمنز کرکٹ ٹیم نے تیسری پوزیشن کے میچ میں بنگلادیش کو شکست دے کر برانز میڈل حاصل کیا تھا، یوں ویمنز کرکٹ ایونٹ میں بھارت، سری لنکا اور پاکستان نے بالترتیب گولڈ، سلور اور برانز میڈلز اپنے نام کیے۔
