تہران: وفاقی وزیر داخلہ محسن نقوی نے ایران کے صدر مسعود پزشکیان سے ملاقات کی، جس میں پاکستان اور ایران کے درمیان دوطرفہ تعلقات، اقتصادی تعاون اور علاقائی صورتحال سمیت مختلف امور پر تبادلہ خیال کیا گیا۔
دونوں جانب سے باہمی روابط اور مختلف شعبوں میں تعاون مزید بڑھانے کے عزم کا اظہار کیا گیا۔ایرانی خبر رساں ادارے کے مطابق صدر مسعود پزشکیان نے ملاقات کے دوران پاکستان اور ایران کو خطے کے اہم ممالک قرار دیتے ہوئے کہا کہ دونوں ممالک وسیع انسانی صلاحیتوں اور قدرتی و علاقائی وسائل سے مالا مال ہیں۔ ان کے مطابق دونوں ممالک اپنی صلاحیتوں کو مشترکہ طور پر بروئے کار لا کر باہمی ضروریات پوری کرنے کے نئے مواقع پیدا کرسکتے ہیں۔مسعود پزشکیان نے کہا کہ پاکستان اور ایران اپنی صلاحیتوں کو یکجا کرکے اور باہمی تعاون کو فروغ دے کر اپنے دستیاب علاقائی وسائل سے زیادہ مؤثر انداز میں فائدہ اٹھا سکتے ہیں۔ انہوں نے دونوں ممالک کے درمیان اعلیٰ سطحی رابطوں کو دوطرفہ تعلقات میں پیش رفت کی علامت قرار دیا۔ایرانی صدر نے تجارت، توانائی، سیاحت اور مشترکہ سرمایہ کاری کے شعبوں میں تعاون مزید بڑھانے کی ضرورت پر زور دیا۔ ان کا کہنا تھا کہ مختلف شعبوں میں قریبی روابط اور مشترکہ منصوبے پاکستان اور ایران کے تعلقات کو مزید مستحکم کرنے میں مددگار ثابت ہوسکتے ہیں۔
انہوں نے اقتصادی تعاون میں سہولتیں پیدا کرنے اور دوطرفہ روابط کا دائرہ وسیع کرنے پر بھی زور دیا۔ صدر پزشکیان کے مطابق دونوں ممالک کے پاس موجود علاقائی صلاحیتوں اور وسائل سے مؤثر انداز میں استفادہ کرکے باہمی تعاون کو نئی سطح پر لے جایا جاسکتا ہے۔ملاقات کے دوران وفاقی وزیر داخلہ محسن نقوی نے کہا کہ پاکستان اور ایران کے درمیان برادرانہ تعلقات اور باہمی تعاون کو مزید فروغ دینے کے لیے اسلام آباد پُرعزم ہے۔ انہوں نے دونوں ممالک کے درمیان مختلف شعبوں میں روابط مضبوط بنانے کی خواہش کا اظہار کیا۔محسن نقوی نے تجارت اور معیشت کے علاوہ سیاحت، سیاست، ثقافت اور سائنس کے شعبوں میں بھی پاک ایران تعاون بڑھانے پر زور دیا۔ انہوں نے کہا کہ پاکستان ایران کے ساتھ تمام باہمی دلچسپی کے شعبوں میں تعاون اور روابط کو مزید مستحکم کرنے کے لیے تیار ہے۔
محسن نقوی ان دنوں ایران کے سرکاری دورے پر ہیں۔ دورے کے دوران انہوں نے ایرانی وزیر داخلہ اسکندر مومنی سے بھی ملاقات کی، جس میں پاک ایران دوطرفہ تعلقات، مختلف شعبوں میں جاری تعاون اور خطے کی تازہ صورتحال پر تبادلہ خیال کیا گیا۔ ایرانی وزیر داخلہ نے علاقائی امن و استحکام کے لیے پاکستان کی کوششوں کو سراہا۔پاک ایران اعلیٰ سطحی رابطوں کا سلسلہ ایسے وقت میں جاری ہے جب دونوں ممالک تجارت، سرحدی امور، علاقائی امن اور باہمی اقتصادی تعاون سمیت مختلف شعبوں میں روابط بڑھانے پر زور دے رہے ہیں۔ موجودہ ملاقات کو بھی دونوں ہمسایہ ممالک کے درمیان دوطرفہ تعاون کے دائرے کو مزید وسیع کرنے کی کوششوں کا حصہ قرار دیا جا رہا ہے۔
