کراچی میں نوجوان تاجر میر رضا کے قتل کے کیس میں تحقیقات جاری ہیں، اور مقتول کی بہن نے اپنے ویڈیو بیان میں کچھ مشکوک معاملات کا انکشاف کیا ہے۔
کیس کے مختلف زاویوں سے تفتیش کی جا رہی ہے، جن میں سے ایک میں ڈی آئی جی عامر فاروقی نے میر رضا کے آخری لمحات کی سی سی ٹی وی فوٹیج جاری کرنے کا عندیہ دیا ہے، تاہم یہ ویڈیو اب تک منظر عام پر نہیں آسکی۔تفتیش کے دوران، میر رضا کے پہلے پوسٹ مارٹم کرنے والے ایم ایل او ڈاکٹر اسامہ شیخ سے پوچھ گچھ کی گئی ہے، اور ان کا موبائل فون بھی فرانزک جانچ کے لیے تحویل میں لیا گیا ہے۔ اس کے علاوہ، پولیس نے ڈاکٹر سمعیہ سید سے بھی مدد لی ہے، جنہوں نے پوسٹ مارٹم رپورٹس میں استعمال ہونے والی طبی اصطلاحات کے حوالے سے تفتیشی ٹیم کو بریفنگ دی۔ طبی اصطلاحات کے باعث تفتیش میں بعض مشکلات کا سامنا ہے۔ذرائع کے مطابق، پولیس ٹیم میر رضا کے مبینہ آخری لمحات کی سی سی ٹی وی فوٹیج جاری کرنے پر غور کر رہی ہے، اور اہلخانہ نے سوال اٹھایا ہے کہ اگر ویڈیو موجود تھی تو اسے خاندان کے ساتھ کیوں شیئر نہیں کیا گیا۔
اس دوران، میر رضا کے کاروباری شراکت دار کو بھی تفتیش میں شامل کیا جا رہا ہے۔ میر رضا کی بہن نے یہ بھی انکشاف کیا کہ خاندان کو فراہم کی گئی سیکیورٹی اچانک واپس لے لی گئی ہے، اور مشکوک گاڑیوں کی جانب سے خاندان کا پیچھا کیا جا رہا ہے۔ انہوں نے بتایا کہ ان کی گلی کے قریب ایک مشکوک گاڑی پیچھا کرتی ہوئی آئی، جس کے بعد ان کے والد نے دوسری گلی سے گاڑی نکال لی۔ والدہ بالکنی میں انتظار میں تھیں اور انہوں نے بھی گاڑی کو آتے دیکھا۔ جب وہ گھر کے قریب پہنچے تو دو گاڑیاں ان کا پیچھا کر رہی تھیں، جس کے بعد پولیس کی موبائل موقع پر پہنچ گئی۔یہ کیس تاحال تفتیش کے مراحل میں ہے، اور مزید پیش رفت کا انتظار ہے۔
