امریکہ نے جنوبی کوریا کو 125 ملین ڈالر مالیت کے جدید فضائی میزائل اور فوجی سازوسامان کی فروخت کی ممکنہ منظوری دے دی ہے۔
میڈیا رپورٹس کے مطابق، امریکی محکمہ خارجہ نے اس دفاعی فروخت کی منظوری دی ہے جس کا مقصد جنوبی کوریا کی فضائی دفاعی صلاحیت کو مضبوط بنانا اور علاقائی خطرات کے خلاف دفاعی تیاری کو بڑھانا ہے۔ جنوبی کوریا نے اے آئی ایم 9 ایکس سائیڈ ونڈر بلاک 103 فضائی میزائل اور 10 ٹیکٹیکل گائیڈنس یونٹس کی خریداری کی درخواست کی تھی۔ یہ میزائل جنگی طیاروں کے ذریعے دشمن کے فضائی اہداف کو نشانہ بنانے کے لیے استعمال ہوتے ہیں۔ اے آئی ایم 9 ایکس ایک جدید قلیل فاصلے کا ہوا سے ہوا میں مار کرنے والا میزائل ہے، جس میں بہتر رہنمائی، تیز ردعمل اور فضائی ہدف کو انتہائی پھرتی سے نشانہ بنانے کی صلاحیت شامل ہے۔
واضح رہے کہ اس معاملے میں امریکی کانگریس کو باضابطہ اطلاع اور جائزے کا مرحلہ ابھی مکمل ہونا ہے۔ مجوزہ دفاعی پیکج کی مجموعی مالیت تقریباً 125 ملین ڈالر ہے۔ یہ پیش رفت ایسے وقت میں ہوئی ہے جب امریکہ اور جنوبی کوریا کے درمیان مشترکہ فوجی مشقیں جاری ہیں اور واشنگٹن کی خطے میں دفاعی حکمت عملی پر بھی غور و فکر کیا جا رہا ہے۔
