ملائیشیا کے وزیر داخلہ سیف الدین ناسوتیون بن اسماعیل نے وزارتِ داخلہ اسلام آباد کا دورہ کیا، جہاں انہوں نے وفاقی وزیر داخلہ محسن نقوی سے ون آن ون ملاقات کی۔
ملاقات کے بعد دونوں ممالک کے وزرائے داخلہ کی قیادت میں وفود کی سطح پر مذاکرات بھی ہوئے۔ملاقات کے دوران انسدادِ دہشت گردی، منشیات کی اسمگلنگ، غیر قانونی امیگریشن، انسانی اسمگلنگ اور سائبر کرائمز سمیت باہمی دلچسپی کے اہم امور پر تفصیلی تبادلہ خیال کیا گیا۔ دونوں جانب سے اس بات پر اتفاق کیا گیا کہ جرائم اور دہشت گردی کے خلاف مؤثر کارروائی کے لیے انٹیلیجنس شیئرنگ اور ادارہ جاتی تعاون کو مزید بڑھایا جائے گا۔
جوائنٹ ورکنگ گروپ قائم کرنے کا فیصلہ
پاکستان اور ملائیشیا نے دونوں ممالک کی وزارتِ داخلہ کے درمیان تعاون کو منظم اور مزید مؤثر بنانے کے لیے جوائنٹ ورکنگ گروپ کے قیام کا فیصلہ کیا۔ اس گروپ کے ذریعے سیکیورٹی، انسدادِ جرائم اور دیگر متعلقہ شعبوں میں تعاون کے نئے مواقع تلاش کیے جائیں گے۔مذاکرات میں اس بات پر بھی اتفاق کیا گیا کہ دہشت گردوں، منشیات فروشوں اور انسانی اسمگلروں کے خلاف مشترکہ حکمتِ عملی کو زیادہ مؤثر بنایا جائے گا۔ دونوں ممالک کے متعلقہ اداروں کے درمیان معلومات کے تبادلے اور باہمی رابطوں کو مزید مضبوط کرنے پر بھی زور دیا گیا۔
پولیس اور تربیتی اداروں میں تعاون
پاکستان اور ملائیشیا نے پولیس کے شعبے میں تربیتی تعاون بڑھانے پر بھی اتفاق کیا۔ اس سلسلے میں نیشنل پولیس اکیڈمی پاکستان اور رائل ملائیشین پولیس کالج کے درمیان روابط اور اشتراک کو فروغ دینے کا فیصلہ کیا گیا۔دونوں ممالک کے اہلکاروں کے لیے تربیتی پروگرامز، تجربات کے تبادلے اور پیشہ ورانہ صلاحیتوں میں اضافے کے امکانات پر بھی گفتگو ہوئی۔
کوسٹ گارڈز کے شعبے میں تعاون
ملاقات میں کوسٹ گارڈز کے شعبے میں تعاون بھی اہم موضوع رہا۔ وفاقی وزیر داخلہ محسن نقوی نے کہا کہ پاکستان ملائیشیا کے کوسٹ گارڈ کے شعبے میں موجود تجربات سے استفادہ کرنا چاہتا ہے۔انہوں نے اس امید کا اظہار کیا کہ ملائیشین وزیر داخلہ کا دورہ دونوں ممالک کے باہمی تعلقات کو نئی سطح پر لے جانے میں اہم سنگِ میل ثابت ہوگا۔
پاکستانی وفد کا ملائیشیا کا دورہ
مذاکرات کے دوران بتایا گیا کہ پاکستان کا ایک اعلیٰ سطحی وفد جلد ملائیشیا کا دورہ کرے گا۔ اس دورے کے دوران انسدادِ دہشت گردی، منشیات، انسانی اسمگلنگ، انٹیلیجنس شیئرنگ اور سیکیورٹی تعاون سے متعلق معاملات کو مزید آگے بڑھایا جائے گا۔
سیاحت اور ویزا سہولیات پر بھی گفتگو
ملاقات میں دونوں ممالک کے درمیان سیاحت کے فروغ اور ویزا سہولیات میں آسانی کے امور بھی زیرِ بحث آئے۔ پاکستان کی جانب سے ملائیشیا کو پاکستانی شہریوں کے لیے ایک اہم سیاحتی مقام قرار دیتے ہوئے سیاحت کے شعبے میں مزید تعاون کی خواہش کا اظہار کیا گیا۔محسن نقوی نے کہا کہ ملائیشیا پاکستانیوں کے لیے سیاحت کا ایک بہترین آپشن ہے۔ انہوں نے مزید کہا کہ پاکستانیوں کے لیے ملائیشیا کا ورک کوٹہ بڑھنے سے مزید پاکستانی قانونی طریقے سے ملائیشیا جا سکیں گے۔دونوں وزرائے داخلہ نے پاکستان اور ملائیشیا کے درمیان دوطرفہ تعلقات کو مزید مستحکم بنانے کے عزم کا اعادہ کیا اور وزارتِ داخلہ سمیت مختلف سیکیورٹی اداروں کے درمیان عملی تعاون کو وسعت دینے پر اتفاق کیا۔
