مقبوضہ کشمیر : ٹریفک حادثہ، 21 افراد جاں بحق، درجنوں زخمی

مسافروں سے بھری بس موڑ کاٹتے بے قابو ہو کر گہری کھائی میں جا گری تھی
سرینگر(آئی این پی )مقبوضہ کشمیر میں  افسوسناک ٹریفک حادثے کے نتیجے میں  جاںبحق افراد کی تعداد21  ہوگئی جبکہ درجنوں زخمی  ہیں ۔ حکام کے مطابق مسافروں سے بھری ایک بس تیز موڑ کاٹتے ہوئے بے قابو ہو کر گہری کھائی میں جا گری، حادثہ صبح ضلع ادھم پور کے قریب کانوٹ گائو ں کے مقام پر پیش آیا۔مقامی انتظامیہ کے مطابق 42 نشستوں والی بس میں 60 سے زائد افراد سوار تھے، جو رام نگر سے ادھم پور جا رہے تھے، بس ایک خطرناک موڑ پر آٹو رکشہ سے ٹکرانے کے بعد سڑک سے پھسل گئی اور تقریبا 100 فٹ گہری کھائی میں جا گری۔ریسکیو حکام کے مطابق 19 افراد موقع پر ہی دم توڑ گئے، جبکہ مزید 2 زخمی ہسپتال میں جانبر نہ ہو سکے۔ حادثے میں تقریبا 45 افراد زخمی ہوئے ہیں، جن میں کئی کی حالت تشویشناک بتائی جا رہی ہے۔ زخمیوں کو مختلف اسپتالوں اور طبی مراکز میں منتقل کر دیا گیا ہے۔ ماہرین کے مطابق زیادہ تر حادثات تیز رفتاری، خستہ حال سڑکوں، ناقص گاڑیوں اور لاپرواہ ڈرائیونگ کے باعث پیش آتے ہیں۔