ممبئی: بالی ووڈ اداکارہ شلپا شیٹی کے گنپتی وسرجن کے دوران کیے گئے ڈانس کا مذاق اڑانے والے ایک انفلوئنسر کو اداکارہ نے دلچسپ اور برجستہ جواب دے کر سوشل میڈیا صارفین کی توجہ حاصل کرلی۔
سوشل میڈیا پر گردش کرنے والی ویڈیو میں ایک انفلوئنسر شلپا شیٹی کے ڈانس اسٹیپس کی مزاحیہ انداز میں نقل کرتا دکھائی دیا۔ ویڈیو کے ساتھ لکھا گیا تھا، ’’شلپا شیٹی میری فیڈ پر‘‘، جس کے بعد یہ کلپ سوشل میڈیا پر وائرل ہوگیا۔شلپا شیٹی کی نظر بھی اس ویڈیو پر پڑی تو انہوں نے معاملے کو سنجیدہ بنانے کے بجائے مزاحیہ انداز میں جواب دیا۔ اداکارہ نے کمنٹ کرتے ہوئے لکھا، ’’اور اب آپ میری فیڈ پر ہیں، ہاہاہا۔‘‘اداکارہ کے اس جواب کو سوشل میڈیا صارفین کی جانب سے بھی توجہ ملی، جبکہ ان کے برجستہ انداز کو مختلف صارفین نے پسند کیا۔ یوں شلپا شیٹی نے تنقید کا جواب براہ راست سخت الفاظ میں دینے کے بجائے مزاحیہ انداز اختیار کیا۔شلپا شیٹی اور ان کے شوہر راج کندرا نے 15 ستمبر کو گنپتی وسرجن کی تقریب میں شرکت کی تھی۔ اس موقع پر اداکارہ اپنے بچوں ویان اور سمیشا کے ہمراہ ڈھول کی تھاپ پر رقص کرتی نظر آئیں، جبکہ انہوں نے کچھ دیر خود بھی ڈھول بجایا۔
تقریب کے دوران شلپا شیٹی پیلے اور گلابی رنگ کی روایتی نوواری ساڑھی اور روایتی زیورات میں ملبوس تھیں۔ اداکارہ نے گنپتی وسرجن کی تقریبات میں بھرپور انداز میں شرکت کی اور خاندان کے ہمراہ مذہبی رسومات میں حصہ لیا۔رپورٹس کے مطابق شلپا شیٹی اور راج کندرا نے رواں برس اپنے گھر گنپتی بپا کی آمد کا 17واں سال منایا۔ وسرجن کے موقع پر سامنے آنے والی ویڈیوز میں اداکارہ کے پرجوش ڈانس نے جہاں مداحوں کی توجہ حاصل کی، وہیں ایک ویڈیو کے ذریعے ان کے ڈانس کی نقل بھی سوشل میڈیا پر گردش کرنے لگی۔
