ویب ڈیسک: کراچی میں نارتھ ناظم آباد کے علاقے کوثر نیازی کالونی میں ایک بہیمانہ واقعہ پیش آیا ہے جہاں ایک سفاک باپ نے اپنی دو کمسن بیٹیوں زینب اور عالیہ کو گلا کاٹ کر قتل کر دیا۔ پولیس حکام کے مطابق ملزم اکبر کو گرفتار کر لیا گیا ہے۔
پولیس کے مطابق ابتدائی تفتیش میں معلوم ہوا ہے کہ ملزم اکبر شدید مالی دباؤ اور قرضوں میں مبتلا تھا۔ اس کے خلاف مختلف کمیٹیوں کے واجبات تھے جنہیں وہ بے روزگاری کے سبب ادا نہیں کر سکا۔ ملزم کی مالی مشکلات اس افسوسناک واقعہ کا سبب بنیں۔ملزم اکبر کے 6 بچے ہیں جن میں ایک بیٹا اور پانچ بیٹیاں شامل ہیں۔ مقتولہ زینب اور عالیہ اس کے تیسرے اور چوتھے نمبر کی بیٹیاں تھیں۔ واقعہ کے بعد پولیس نے ملزم کے خلاف مقدمہ درج کر لیا ہے اور مزید تفتیش کا آغاز کیا ہے تاکہ اس واقعہ کے پیچھے اصل محرکات کا پتہ چلایا جا سکے۔یہ دلخراش واقعہ معاشرتی اور نفسیاتی مسائل کی طرف بھی توجہ مبذول کراتا ہے اور اس نوعیت کے واقعات کی روک تھام کے لیے موثر اقدامات کی ضرورت کو ظاہر کرتا ہے۔
