عیدالاضحیٰ کے دوران کراچی کا موسم معمول کے مطابق گرم اور مرطوب رہے گا، نہ ہی ہیٹ ویو کا کوئی خطرہ ہے اور نہ ہی بحیرہ عرب میں کسی سائیکلون کی سرگرمی نظر آتی ہے۔
عائشہ کنول کے مطابق، شہر پر کسی ویسٹرن سسٹم کے اثرات متوقع نہیں ہیں، اور عید کے دوران درجہ حرارت 24 سے 36 ڈگری سینٹی گریڈ کے درمیان رہنے کا امکان ہے، لیکن ہوا میں نمی کے تناسب میں تبدیلی کے باعث گرمی کی شدت زیادہ محسوس ہو سکتی ہے۔ انہوں نے شہریوں کو مشورہ دیا ہے کہ وہ غیر ضروری طور پر دھوپ میں زیادہ وقت گزارنے سے گریز کریں، پانی کا زیادہ استعمال کریں، اور خود کو دھوپ اور گرمی سے محفوظ رکھیں۔ ماہر موسمیات کا کہنا ہے کہ فی الحال ہیٹ ویو کے امکانات نہیں ہیں، تاہم موسم کی عمومی کیفیت کے پیش نظر احتیاطی تدابیر اختیار کرنا ضروری ہے۔
