بسنت فیسٹیول کے لئے سکولوں کی چھتوں کی نیلامی کرنے کا فیصلہ

 چھٹیوں سے بسنت کو محفوظ انداز میں منانے میں مدد ملے گی، ٹریفک کا بوجھ کم ہوگا
لاہور میں  4روزہ چھٹیوں پر غور، جس سے شہریوں کو ’’لانگ ویک اینڈ‘‘ملنے کا امکان ہے
، دہلی ،  شیرانوالہ ،  موچی گیٹ، کابلی محل، رنگ محل، گورنمنٹ سکول شیشہ موتی بازارشامل ہیں
 لاہور (یواین پی) لاہور میں بسنت فیسٹیول کی تیاریاں تیزی سے جاری ہیں اور ڈسٹرکٹ ایجوکیشن اتھارٹی نے چند سرکاری سکولوں کی چھتوں کو بسنت کے پروگرامز کے لیے نیلامی کرنے کا فیصلہ کیا ہے۔ اسی دوران انتظامیہ فروری کے پہلے ہفتے میں بسنت کے موقع پر چار روزہ تعطیلات دینے پر بھی غور کر رہی ہے تاکہ شہر میں جشن بسنت محفوظ اور منظم انداز میں منایا جا سکے۔اس سلسلے میں ضلعی انتظامیہ اور والڈ سٹی کو بھی شامل کیا گیا ہے۔ نیلامی کا عمل سیکرٹری سکولز ایجوکیشن کی منظوری کے بعد شروع ہوگا۔اس فیصلے کے تحت گورنمنٹ وکٹوریہ گرلز ہائی سکول، گورنمنٹ ہائی سکول دہلی گیٹ، گورنمنٹ بوائز اینڈ گرلز ہائی سکول شیرانوالہ گیٹ، گورنمنٹ سکول موچی گیٹ، گورنمنٹ سکول کابلی محل، گورنمنٹ گرلز ہائی سکول رنگ محل، گورنمنٹ کرشن ہائی سکول رنگ محل، گورنمنٹ ماڈل ہائی سکول تکیہ سادھواں، گورنمنٹ سکول شیشہ موتی بازار، گورنمنٹ ہائی سکول سی ڈی جی ایل بھاٹی گیٹ، آصفہ ماڈل سکول شیرانوالہ گیٹ، گورنمنٹ ہائی سکول چونا منڈی اور گورنمنٹ ہائی سکول گوالمنڈی شامل ہیں۔دوسری جانب بسنت کے موقع پر لاہور میں فروری کے پہلے ہفتے میں 4روزہ چھٹیوں پر بھی غور کیا جا رہا ہے، جس سے شہریوں کو ’’لانگ ویک اینڈ‘‘ملنے کا امکان ہے۔ انتظامیہ کا کہنا ہے کہ چھٹیوں سے بسنت کو محفوظ انداز میں منانے میں مدد ملے گی اور شہر میں ٹریفک کا بوجھ بھی کم ہوگا۔