گورنر پنجاب سردار سلیم حیدر نے گجرات میں کسان ونگ کے کنونشن سے خطاب کرتے ہوئے انتخابات کی غیر جانبداری پر سوالات اٹھائے اور کہا کہ آج تک کوئی ایسا شخص نہیں ملا جو یہ کہے کہ انتخابات مکمل طور پر غیر جانبدارانہ ہوئے ہیں۔
انہوں نے پنجاب کی موجودہ حکومتی پالیسیوں پر بھی تنقید کی اور کہا کہ کسانوں کو مافیا قرار دینے والے حکمرانوں سے پیپلز پارٹی کا تعاون کرنے کا نقصان ہوا ہے۔سردار سلیم حیدر نے کسانوں کے مسائل پر بات کرتے ہوئے کہا کہ حکومتی سطح پر کسانوں کی اہمیت کو نظر انداز کیا جا رہا ہے اور ان کے حقوق کے لئے مناسب اقدامات نہیں کیے جا رہے۔ انہوں نے اپنے خطاب میں مزید کہا کہ اگر بات صرف عوامی مسائل کی ہو تو وہ ہمیشہ عوام کے حق میں بات کریں گے، کیونکہ ان کی ترجیح عوام کی فلاح و بہبود ہے۔
گورنر پنجاب نے کسانوں کی حالت زار کو اجاگر کرتے ہوئے یہ دعویٰ بھی کیا کہ پنجاب میں حکومتی سطح پر کسانوں کے مسائل حل کرنے کے بجائے ان کی حالت مزید خراب کی جا رہی ہے، اور ان کی سخت پالیسیوں نے کسانوں کو مشکلات میں مبتلا کر دیا ہے۔ ان کا کہنا تھا کہ کسانوں کو مافیا کے طور پر پیش کرنا غیر منصفانہ ہے اور اس کے نتیجے میں کسانوں کے لیے مزید مشکلات پیدا ہو رہی ہیں۔
