پنجاب میں15 دسمبرسے 15 جنوری 2027 کے درمیان بلدیاتی انتخابات صوبائی حکومت اور الیکشن کمیشن میں اتفاق

 صوبائی حکومت مرحلہ وار  بلدیاتی انتخابات کروانا چاہتی ہے تو  جلد اپنا  پلان  الیکشن کمیشن  کے سامنے  مشاورت کیلئے پیش کرے
   پنجاب میں  بلدیاتی انتخابات کے انعقاد کے سلسلے میں  صوبائی کابینہ  کمیٹی  کی تجاویز  کوسراہتے ہیں: چیف الیکشن کمشنر 
 لاہور(آئی این پی )الیکشن کمیشن  آف پاکستان اور پنجاب حکومت کے درمیان 15 دسمبر2026 سے 15 جنوری 2027 کے درمیان صوبے میں بلدیاتی انتخابات کروانے پر اتفاق ہوگیا ۔الیکشن کمیشن آف پاکستان میں چیف الیکشن کمشنر سکندر سلطان راجہ  کی سربراہی میں صوبہ پنجاب میں بلدیاتی  انتخابات کے انعقاد  کی تاریخ مقرر  کرنے سے متعلق  اہم اجلاس منعقد ہوا۔ چیف الیکشن کمشنر نے بلدیاتی  حکومتوں کے قیام  کی اہمیت پر روشنی ڈالی  اور کہا کہ  آئین پاکستان  کےآرٹیکل 140-A کے تحت بلدیاتی انتخابات کا انعقاد  ایک آئینی تقاضہ  ہے ۔۔الیکشن کمیشن نے  صوبائی حکومت کی 15دسمبر 2026سے  15جنوری 2027 کے دوران  بلدیاتی انتخابات  کروانے کی تجویز سے اصولی  طور پر  اتفاق کیا  اور کہا  کہ اگر  صوبائی حکومت مرحلہ وار  بلدیاتی انتخابات  کروانا چاہتی ہے تو اس سلسلے میں جلد ازجلد اپنا  پلان  الیکشن کمیشن  کے سامنے  مشاورت کیلئے پیش کرے۔  چیف الیکشن کمشنر نے  پنجاب میں  بلدیاتی انتخابات کے انعقاد کے سلسلے میں  پنجاب کابینہ  کی کمیٹی  کی تجاویز  کو سراہا اور کہا  کہ اس سے ایک  آئینی ذمہ داری کو مکمل  کرنے کی راہ ہموار ہوگی۔