دبئی نے دنیا کی سب سے بڑی اور سب سے جدید آٹو مارکیٹ بنانے کے منصوبے کا باقاعدہ آغاز کردیا ہے۔
یہ منصوبہ نہ صرف گاڑیوں کی خرید و فروخت کے انداز کو بدل کر رکھ دے گا بلکہ دبئی کی معیشت کو بھی نئی بلندیوں پر لے جانے کا ہدف رکھتا ہے۔اس منصوبے کا افتتاح متحدہ عرب امارات کے نائب وزیراعظم شیخ مکتوم بن محمد بن راشد المکتوم نے کیا۔ انہوں نے اس موقع پر کہا کہ اس آٹو مارکیٹ کا مقصد 2033 تک دبئی کی معیشت کو دگنا کرنا ہے، جس سے نہ صرف خطے میں بلکہ عالمی سطح پر بھی اس کی اہمیت میں اضافہ ہوگا۔
مارکیٹ کی تفصیلات اور قیام کا مقام
دبئی کی موجودہ آٹو ٹریڈنگ کی مالیت تقریباً 6.8 بلین درہم (پاکستانی روپے میں تقریباً 51.4 ارب روپے) ہے، جسے اس منصوبے کے تحت دگنا کرنے کا ارادہ ہے۔ یہ مارکیٹ تقریباً 2 کروڑ 20 لاکھ مربع فٹ کے رقبے پر مشتمل ہوگی، جہاں سالانہ 8 لاکھ سے زائد گاڑیوں کی خرید و فروخت ممکن ہوگی۔
اس مارکیٹ میں شامل ہوں گے:
1،500 سے زیادہ شورومز
مخصوص ورکشاپ زونز
گودام اور ملٹی سٹوری پارکنگز
آکشن ہاؤسز
کنونشن سینٹر
ہوٹل
ریٹیل اسٹورز اور فوڈ اینڈ بیورجز آؤٹ لیٹس
منصوبہ بندی اور بنیادی مقام
یہ جدید آٹو مارکیٹ دبئی کی اہم تجارتی بندرگاہ جبل علی کے زیر انتظام قائم کی جائے گی۔ اسے گاڑیوں کی تجارت اور ری ایکسپورٹ کے عالمی نیٹ ورک کے سبب منتخب کیا گیا ہے، تاکہ مارکیٹ کو عالمی سطح پر زیادہ سے زیادہ رسائی اور سہولیات فراہم کی جا سکیں۔
عالمی سطح پر اثرات اور مارکیٹ کی نوعیت
یہ مارکیٹ الیکٹرک، ہائبرڈ اور روایتی گاڑیوں کی عالمی تجارت کو ایک ہی جگہ پر مجتمع کرے گی، جس سے نہ صرف خریداروں اور فروخت کنندگان کو سہولت ہوگی بلکہ افریقہ، مشرق وسطیٰ اور جنوب مشرقی ایشیا کے تیزی سے بڑھتے ہوئے بازاروں کو بھی براہ راست جوڑنے کا موقع فراہم ہوگا۔ اس سے عالمی سطح پر گاڑیوں کی درآمد و برآمد میں نمایاں اضافہ متوقع ہے۔
