پرانا کاہنہ کے علاقے پانچ نمبر سٹاپ کے قریب ایک افسوسناک ٹریفک حادثہ پیش آیا جس میں ایک نوجوان جان کی بازی ہار گیا۔
ذرائع کے مطابق لاہور کے علاقے پرانا کاہنہ میں موٹرسائیکل اور ٹریکٹر ٹرالی کے درمیان زور دار تصادم ہوا۔ ریسکیو حکام کا کہنا ہے کہ حادثے کے نتیجے میں موٹرسائیکل سوار نوجوان شدید زخمی ہوا، تاہم وہ زخموں کی تاب نہ لاتے ہوئے موقع پر ہی دم توڑ گیا۔اطلاع ملتے ہی ریسکیو ٹیمیں فوری طور پر جائے وقوعہ پر پہنچ گئیں، جہاں ضروری کارروائی کے بعد لاش کو پولیس کے حوالے کر دیا گیا۔ پولیس کے مطابق واقعے کی تحقیقات شروع کر دی گئی ہیں اور حادثے کی اصل وجوہات جاننے کے لیے شواہد اکٹھے کیے جا رہے ہیں۔حادثے کے بعد علاقے میں کچھ دیر کے لیے ٹریفک کی روانی بھی متاثر رہی، تاہم بعد ازاں اسے بحال کر دیا گیا۔ مقامی افراد نے اس نوعیت کے حادثات کی روک تھام کے لیے ٹریفک قوانین پر سختی سے عملدرآمد کا مطالبہ کیا ہے۔
