سینئر بھارتی فلم ساز ایم ایم بیگ کا اچانک انتقال ہو گیا ہے۔
وہ اپنی رہائش گاہ پر مردہ پائے گئے، اور ان کی عمر ستر برس سے زائد تھی۔ ایم ایم بیگ معروف چائلڈ آرٹسٹ بیبی گڈو کے والد تھے اور بھارت کی متعدد مشہور ہندی فلموں سے وابستہ رہے۔پبلسِسٹ حنیف زویری کے مطابق، ایم ایم بیگ کچھ عرصے سے علیل تھے اور حالیہ دنوں میں چار سے پانچ روز تک گھر سے باہر نہیں نکلے تھے۔ مکان سے بدبو آنے پر پڑوسیوں نے پولیس کو اطلاع دی، جنہوں نے دروازہ توڑ کر اندر سے ان کی لاش برآمد کی اور اہلِ خانہ کو اطلاع دی۔ بعد ازاں، میت کو پوسٹ مارٹم کے لیے اسپتال منتقل کر دیا گیا ہے۔ایم ایم بیگ نے اپنے فلمی کیریئر کا آغاز بطور اسسٹنٹ ہدایتکار کیا، اور جے اوم پرکاش، وِمل کمار اور راکیش روشن کے ساتھ کام کیا۔ انہوں نے ’جیسی کرنی ویسی بھرنی‘، ’آدمی کھلونا ہے‘، اور ’قرض چکانا ہے‘ سمیت متعدد فلموں سے وابستہ رہ کر اپنی پہچان بنائی۔ بطور ہدایتکار، انہوں نے دو فلمیں بنائیں جن میں نصیرالدین شاہ کی ’معصوم گواہ‘ شامل ہے، مگر یہ فلم باکس آفس پر کامیاب نہ ہو سکی۔ دوسری فلم ’چھوٹی بہو‘ تھی، جس میں شلپا شیروڈکر نے مرکزی کردار ادا کیا۔
حنیف زویری کے مطابق، ایم ایم بیگ کا راکیش روشن کے ساتھ خوشگوار تعلق تھا اور انہوں نے ریتھک روشن کی پہلی فلم ’کہو نا پیار ہے‘ کے لیے ابتدائی فنی تربیت میں بھی معاونت فراہم کی، خاص طور پر مکالمہ ادائیگی اور آواز کے اتار چڑھاؤ کے حوالے سے۔ ان کا انتقال بھارتی فلم انڈسٹری کے لیے ایک بڑا صدمہ ہے، اور ان کی خدمات کو یاد کیا جائے گا۔
