پاکستان کرکٹ بورڈ (پی سی بی) نے اعلان کیا ہے کہ پاکستان سپر لیگ (پی ایس ایل) کے 10ویں ایڈیشن کے پلیئر ڈرافٹس کی میزبانی بلوچستان کے تاریخی شہر گوادر میں کی جائے گی۔
یہ پہلا موقع ہے جب پی ایس ایل کا پلیئر ڈرافٹ کسی دوسرے شہر میں منعقد ہوگا، اور اس کا مقصد گوادر کی ثقافتی اور اقتصادی اہمیت کو اجاگر کرنا ہے۔پی سی بی کے چیئرمین محسن نقوی نے اس اعلان پر تبصرہ کرتے ہوئے کہا کہ گوادر پاکستان کی ساحلی پٹی اور اسٹریٹجک اہمیت کے لحاظ سے ملک کے معاشی مستقبل کا مرکز ہے۔ اس فیصلے کے ذریعے پی سی بی نے گوادر کو عالمی سطح پر کرکٹ کے منظرنامے میں متعارف کرانے اور اس شہر کی اہمیت کو دنیا کے سامنے لانے کی کوشش کی ہے۔ انہوں نے کہا کہ 11 جنوری 2025 کو ہونے والی اس تقریب میں تمام فرنچائزز اور متعلقہ اسٹیک ہولڈرز کا خیرمقدم کرنے کے لیے وہ انتہائی پرجوش ہیں۔
پی ایس ایل کے چیف ایگزیکٹو آفیسر سلمان نصیر نے بھی گوادر میں ڈرافٹ کی میزبانی کو پی ایس ایل کی عالمی سطح پر رسائی کو بڑھانے اور پاکستان کے کونے کونے تک اس کے اثرات پھیلانے کے لیے اہم قدم قرار دیا۔ ان کا کہنا تھا کہ اس اقدام سے دنیا بھر میں پاکستان کی خوبصورتی اور کرکٹ کی محبت کا پیغام جائے گا۔دوسری جانب، پی سی بی نے یہ بھی اعلان کیا ہے کہ کھلاڑیوں کی ریلیگیشن اور ریٹینشن کے حوالے سے فیصلے دسمبر کے آخر میں کیے جائیں گے۔ تاہم، پلیئر ڈرافٹ کی تقریب کا آغاز وقت اور مقام کے حوالے سے تفصیلات ابھی جاری نہیں کی گئی ہیں۔
