پاکستان سپر لیگ (پی ایس ایل) کی معروف فرنچائز ملتان سلطانز کے اونر علی ترین نے حالیہ انٹرویو میں ایک اہم انکشاف کیا ہے کہ پی ایس ایل 2024 کے پلئیرز ڈرافٹ کے لیے گوادر کا انتخاب فرنچائز مالکان سے مشاورت کیے بغیر کیا گیا تھا۔
علی ترین نے بتایا کہ انہیں پی ایس ایل کے واٹس ایپ گروپ میں پیغام ملا کہ اس سال پی ایس ایل کا ڈرافٹ گوادر میں ہوگا، اور اس فیصلے پر فرنچائز مالکان کو نہ تو پہلے مطلع کیا گیا تھا اور نہ ہی مشاورت کی گئی تھی، جس پر وہ پریشان ہوگئے تھے۔علی ترین نے وضاحت کی کہ انہیں اور دیگر فرنچائز مالکان کو اس فیصلے سے متعلق کوئی تفصیلات فراہم نہیں کی گئیں اور نہ ہی اس فیصلے کی بنیاد پر بات کی گئی۔ بعد ازاں جب فرنچائز مالکان نے مزید وضاحت مانگی، تو جواب آیا "فائنل بھائی"، لیکن اس کے باوجود ان کے ذہن میں سوالات باقی تھے۔ ان کے مطابق، یہ بات سمجھنے میں مشکل ہو رہی تھی کہ گوادر کو منتخب کرنے کا فیصلہ کس بنیاد پر کیا گیا ہے۔علی ترین نے بتایا کہ انہیں فوری طور پر ایک پریس ریلیز بھیجنے کی اطلاع دی گئی، لیکن فرنچائز مالکان کو یہ مسئلہ تھا کہ گوادر کی ٹریول پالیسی اور بلوچستان کے سفری اصول بیرون ملک کھلاڑیوں اور کوچز کی آمد میں رکاوٹ ڈال سکتے ہیں۔
علی ترین کے مطابق، غیر ملکی کھلاڑیوں اور کوچز کو گوادر پہنچنے کے لیے ممکنہ سفری پیچیدگیاں اور انشورنس کے مسائل درپیش ہو سکتے ہیں، جس پر پی ایس ایل حکام کا جواب یہ تھا کہ وہ اس مسئلے سے نمٹ لیں گے۔آخرکار، اس مسئلے کے حل کے بعد پی ایس ایل ڈرافٹ کی جگہ تبدیل کرکے لاہور میں کر دی گئی، جس سے فرنچائز مالکان کی تشویش میں کمی آئی۔ علی ترین نے اس تمام صورتحال پر کہا کہ انہیں خوشی ہے کہ ڈرافٹ کا مقام تبدیل کرکے لاہور میں کیا گیا، جس سے کھلاڑیوں اور کوچز کو سفری پیچیدگیوں کا سامنا نہیں ہوگا۔
