حالیہ جنگ بندی کے باوجود اسرائیلی فوج کی کارروائیاں لبنان میں جاری ہیں، اور اسرائیلی وزیراعظم بینجمن نیتن یاہو نے یلو لائن کے علاقے میں فوجی موجودگی برقرار رکھنے کا اعلان کیا ہے۔
الجزیرہ کی رپورٹ کے مطابق، جنگ بندی کے چند گھنٹوں بعد ہی جنوبی لبنان میں اسرائیلی گولہ باری، مکانات کی مسماری اور زمینی کارروائیاں جاری رہیں، جس سے معاہدے کی ساکھ متنازعہ ہو گئی ہے۔اسرائیلی اقدام کے مرکز میں یلو لائن ہے، جو سرحد سے تقریباً 10 کلومیٹر اندر ایک فوجی زون ہے، جس پر اسرائیل کا کنٹرول برقرار ہے۔ لبنان اور حزب اللہ نے اسے اپنی خودمختاری کی خلاف ورزی قرار دیا ہے۔مبصرین کا کہنا ہے کہ یلو لائن کا ماڈل غزہ میں پہلے بھی نافذ کیا جا چکا ہے، جہاں شہری نقل و حرکت محدود ہے، اور اسی طرح لبنان کے دیہات بھی اسرائیلی کنٹرول میں آ سکتے ہیں۔جنگ بندی کے متن میں واضح ابہام موجود ہے، جس کے مطابق جنگی کارروائیوں کا خاتمہ تو ہوا ہے، مگر اسرائیل کو دفاع کے نام پر کسی بھی وقت کارروائی کا حق دیا گیا ہے۔فضائی حملوں اور توپ خانے کی کارروائیوں کے ذریعے اسرائیل اپنی حکمت عملی کے ذریعے مستقبل کے مذاکرات میں برتری حاصل کرنا چاہتا ہے، جب کہ لبنانی عوام میں خدشہ ہے کہ یہ عارضی فوجی زون مستقل قبضے میں تبدیل ہو سکتا ہے۔
