وزیراعظم پاکستان شہباز شریف نے کہا ہے کہ مسئلہ کشمیر کا پُرامن اور منصفانہ حل ہی جنوبی ایشیا کے دیرپا امن اور استحکام کی اصل ضمانت ہے۔
اُن کا کہنا ہے کہ بھارت کے تمام تر مظالم، ظلم و ستم اور لاکھوں فوجیوں کی موجودگی کے باوجود کشمیری عوام کا جذبہ حریت آج بھی زندہ ہے۔آج 19 جولائی کو یوم الحاقِ پاکستان منایا جا رہا ہے، جو کشمیری عوام کی جانب سے 1947ء میں پاکستان کے ساتھ الحاق کی متفقہ قرارداد کی یاد میں منایا جاتا ہے۔ یہ وہ دن ہے جب کشمیری قیادت نے جموں و کشمیر کے پاکستان کے ساتھ الحاق کے حق میں تاریخی فیصلہ کیا تھا۔
وزیراعظم کا کشمیری عوام سے اظہارِ یکجہتی
اس موقع پر اپنے خصوصی پیغام میں وزیراعظم شہباز شریف نے کہا کہ:"بھارت کی دس لاکھ سے زائد افواج بھی کشمیری عوام کے جذبہ آزادی کو ختم نہیں کر سکیں، کشمیریوں کی تیسری نسل بھی آج حقِ خودارادیت کے لیے پرعزم ہے۔ یہ ایک واضح ثبوت ہے کہ بھارت کشمیریوں کے دل و دماغ کبھی فتح نہیں کر سکا۔"وزیراعظم نے کہا کہ کشمیری عوام نے دہائیوں پر محیط جدوجہد کے ذریعے یہ ثابت کیا ہے کہ وہ بھارت کے ناجائز قبضے کو قبول کرنے کو تیار نہیں۔ ان کا مزید کہنا تھا:"ہم کشمیری عوام کے ساتھ تھے، ہیں اور ہمیشہ رہیں گے۔ پاکستان اقوام متحدہ کی قراردادوں اور کشمیری عوام کی امنگوں کے مطابق مسئلہ کشمیر کے حل کے لیے ہر پلیٹ فارم پر آواز بلند کرتا رہے گا۔"
پاکستانی قوم کا عزم
وزیراعظم نے پاکستانی قوم کی جانب سے کشمیریوں کو خراجِ تحسین پیش کیا اور کہا کہ پاکستانی عوام کشمیری بھائیوں اور بہنوں کے حقِ خودارادیت کی جدوجہد میں اُن کے ساتھ شانہ بشانہ کھڑے ہیں۔انہوں نے عالمی برادری سے بھی اپیل کی کہ وہ بھارت کی انسانی حقوق کی سنگین خلاف ورزیوں کا نوٹس لے اور کشمیری عوام کو اُن کا جائز حق دلوانے میں اپنا کردار ادا کرے۔
