لندن: آبنائے ہرمز کے ذریعے تیل کی برآمدات کے حوالے سے غیر یقینی صورتحال کے سبب عالمی مارکیٹ میں تیل کی قیمتوں میں مسلسل چوتھے روز اضافہ دیکھا گیا ہے۔
رائٹرز کے مطابق، سرمایہ کار تہران اور واشنگٹن کے بیانات کا جائزہ لے رہے ہیں تاکہ معلوم کر سکیں کہ آبنائے ہرمز سے بحری جہازوں کی آمدورفت معمول کے مطابق جاری ہے یا نہیں۔ اس غیر یقینی صورتحال کے نتیجے میں مارکیٹ میں خدشات پیدا ہو گئے ہیں۔برینٹ خام تیل کی قیمت 26 سینٹ یا 0.29 فیصد اضافے کے بعد 91.28 ڈالر فی بیرل پر پہنچ گئی ہے، جبکہ امریکی ویسٹ ٹیکساس انٹرنیشنل خام تیل 37 سینٹ یا 0.44 فیصد اضافے کے ساتھ 85.31 ڈالر فی بیرل پر بند ہوا ہے۔دونوں اقسام کے تیل کی قیمتیں منگل کو 24 جولائی کے بعد بلند ترین سطح پر بند ہوئی تھیں۔عالمی مارکیٹ میں تیل کی قیمتوں میں اضافے کی اہم وجہ، امریکا اور ایران کے درمیان جنگ بندی اور امن معاہدے کے امکانات میں کمی ہے، جس سے تیل کی سپلائی کے حوالے سے خدشات برقرار ہیں۔ اس صورتحال نے سرمایہ کاروں کے اعتماد کو متاثر کیا ہے اور مارکیٹ میں تیزی دیکھی جا رہی ہے۔
