پاکستان میں بیساکھی کی تقریبات میں شرکت کے لیے آئے ہوئے بھارتی سکھ یاتری واپس اپنے وطن بھارت روانہ ہوگئے ہیں۔
یہ یاتری واہگہ بارڈر کے ذریعے اپنے وطن روانہ ہوئے۔اس موقع پر صوبائی وزیرِ اقلیتی امور، رمیش سنگھ اروڑہ، ایڈیشنل سیکریٹری سیف اللّٰہ کھوکھر اور پاکستان سکھ گوردوارہ پربندھک کمیٹی کے ممبران بھی موجود تھے۔ صوبائی وزیر رمیش سنگھ اروڑہ نے سکھ یاتریوں کو محبت کے ساتھ رخصت کرتے ہوئے ان کے سفر کی کامیابی کی دعا کی۔انہوں نے اپنے خطاب میں کہا کہ "میں دعا گو ہوں کہ آپ لوگ واپس آئیں اور ہم مل کر محبتیں بانٹیں۔" وزیرِ اقلیتی امور نے مزید کہا کہ پاکستانی حکومت نے یاتریوں کو بہترین سہولت فراہم کرنے کی کوشش کی اور ان کی خدمت میں کوئی کمی نہیں چھوڑی۔
انہوں نے یہ بھی کہا کہ آئندہ کی یاتریوں کے لیے ویزوں کی تعداد میں اضافہ کرنے کی کوشش کی جائے گی تاکہ مزید سکھ یاتری پاکستان آ سکیں اور دونوں ممالک کے درمیان روابط مزید مضبوط ہوں۔بیساکھی کے موقع پر سکھ یاتریوں نے پاکستان میں مختلف گوردواروں کی زیارت کی اور مذہبی رسومات ادا کیں۔ ان کی روانگی کے وقت پاکستان کے عوام اور حکومت کی طرف سے ان کے سفر کے لیے نیک خواہشات کا اظہار کیا گیا۔
