افغانستان کے خلاف تیسرے ٹی ٹوئنٹی میں بھارتی اوپنر کی 108 رنز کی دھواں دار اننگز، بھارت نے میچ 127 رنز سے جیت کر سیریز 0-3 سے اپنے نام کرلی
نئی دہلی: بھارتی بائیں ہاتھ کے اوپنر ابھیشیک شرما نے ٹی ٹوئنٹی انٹرنیشنل کرکٹ میں بھارت کی جانب سے تیز ترین سنچری اسکور کرکے نئی تاریخ رقم کردی۔ارون جیٹلی اسٹیڈیم میں افغانستان کے خلاف تیسرے ٹی ٹوئنٹی میچ میں بھارت نے ٹاس کے بعد بیٹنگ شروع کی تو ابھیشیک شرما نے اننگز کا جارحانہ آغاز کیا اور افغان بولرز کے خلاف بھرپور حملہ کرتے ہوئے صرف 30 گیندوں پر سنچری مکمل کرلی۔ابھیشیک شرما نے مجموعی طور پر 34 گیندوں پر 108 رنز کی شاندار اننگز کھیلی، جس میں 11 چھکے اور 9 چوکے شامل تھے۔ ان کی جارحانہ بیٹنگ نے بھارتی ٹیم کو مقررہ 20 اوورز میں 7 وکٹوں کے نقصان پر 221 رنز تک پہنچانے میں اہم کردار ادا کیا۔
سکندر رضا اور فن ایلن کا ریکارڈ توڑ دیا
ابھیشیک شرما کی 30 گیندوں پر سنچری کسی بھی فل ممبر ملک کے کھلاڑی کی جانب سے ٹی ٹوئنٹی انٹرنیشنل میں تیز ترین سنچری ہے۔اس سے قبل زمبابوے کے سکندر رضا اور نیوزی لینڈ کے فن ایلن نے 33، 33 گیندوں پر سنچری اسکور کرنے کا ریکارڈ قائم کیا تھا، جسے ابھیشیک شرما نے تین گیندیں پہلے سنچری مکمل کرکے توڑ دیا۔تاہم ٹی ٹوئنٹی انٹرنیشنل کرکٹ میں مجموعی طور پر تیز ترین سنچری کا ریکارڈ اب بھی ایسٹونیا کے ساحل چوہان کے پاس ہے، جنہوں نے 2024 میں قبرص کے خلاف صرف 27 گیندوں پر سنچری مکمل کی تھی۔ترکیہ کے محمد فہد نے 2025 میں بلغاریہ کے خلاف 29 گیندوں پر سنچری اسکور کرکے اس فہرست میں دوسری پوزیشن حاصل کی تھی۔
افغانستان کی ٹیم 94 رنز پر آؤٹ
بھارت کی جانب سے دیے گئے 222 رنز کے ہدف کے تعاقب میں افغانستان کی بیٹنگ لائن بھارتی بولرز کے سامنے زیادہ دیر نہ ٹھہر سکی اور پوری ٹیم 94 رنز پر ڈھیر ہوگئی۔یوں بھارت نے تیسرے ٹی ٹوئنٹی میں 127 رنز سے کامیابی حاصل کرتے ہوئے تین میچوں کی سیریز 0-3 سے اپنے نام کرلی۔ابھیشیک شرما کی ریکارڈ ساز سنچری نہ صرف بھارت کی فتح کا اہم حصہ بنی بلکہ ٹی ٹوئنٹی انٹرنیشنل میں تیز ترین سنچریوں کی فہرست میں بھی ایک نیا سنگِ میل قائم کرگئی۔
