پاکستان کرکٹ ٹیم کے آل راؤنڈر شاداب خان نے ٹی ٹوئنٹی کرکٹ میں ایک اور شاندار کارنامہ انجام دیتے ہوئے اپنے کیریئر کی دوسری ہیٹ ٹرک مکمل کرلی۔
شاداب خان نے کیریبیئن پریمیئر لیگ (سی پی ایل) میں اینٹیگا اینڈ باربوڈا فیلکنز کی نمائندگی کرتے ہوئے گیانا ایمیزون واریئرز کے خلاف شاندار بولنگ کا مظاہرہ کیا اور مسلسل تین گیندوں پر تین اہم وکٹیں حاصل کیں۔شاداب خان نے اننگز کے نویں اوور کی آخری تین گیندوں پر پہلے شمرون ہیٹمایر کو پویلین کی راہ دکھائی، اس کے بعد مہدی حسن میراز اور کوئینٹین سیمپسن کو آؤٹ کرکے اپنی ہیٹ ٹرک مکمل کی۔اس کارکردگی کے ساتھ شاداب خان نے سی پی ایل میں بھی تاریخ رقم کردی۔ وہ کیریبیئن پریمیئر لیگ میں ہیٹ ٹرک کرنے والے تیسرے بولر بن گئے ہیں۔ٹی ٹوئنٹی کرکٹ میں یہ شاداب خان کی دوسری ہیٹ ٹرک ہے۔ دستیاب اعداد و شمار کے مطابق پاکستان کے سابق فاسٹ بولر محمد سمیع تین ہیٹ ٹرکس کے ساتھ شاداب خان سے آگے ہیں۔
شاداب خان نے رواں سال ٹی ٹوئنٹی کرکٹ میں بھی اپنی مستقل مزاجی کا مظاہرہ کیا ہے۔ وہ 2026 میں اب تک 67 ٹی ٹوئنٹی وکٹیں حاصل کرچکے ہیں اور اس سال سب سے زیادہ ٹی ٹوئنٹی وکٹیں لینے والے بولرز میں نمایاں ہیں۔شاداب خان کی ہیٹ ٹرک نہ صرف ان کی انفرادی کارکردگی میں ایک اور اہم سنگ میل ہے بلکہ اس سے اینٹیگا اینڈ باربوڈا فیلکنز کے لیے بھی میچ میں ان کی اہمیت مزید نمایاں ہوگئی ہے۔
